Prezıdent Qasym-Jomart Toqaevtyń jetinshi saılanǵan Parlamenttiń úshinshi sessııasynyń ashylýynda Qazaqstan halqyna kezekti Joldaýyn arnady.
Memleket basshysynyń Joldaýyn úkimettik emes uıymnyń ujymy birge otyryp tamashaladyq. Shynyn aıtý kerek, bul jolǵy Joldaýdyń máni erekshe boldy. Kútpegen jańalyqtarǵa, sensasııaǵa toly boldy desek qatelespeımiz.
Prezıdent halyqtyń kókeıinde júrgen máselelerdi dóp basyp aıtyp, eldiń kóńilinen shyǵatyn reformalar men josparlardy da ortaǵa saldy. Jasyratyny joq, sońǵy kezde elde áleýmettik másele jıi kóterile bastady. Qymbatshylyq bir jaǵynan qyssa, keıbir taýar tapshylyǵy halyqtyń eńsesin basty. Osy oraıda Prezıdent sapaly, batyl ári jyldam áreket jasaıtyn memlekettik basqarý júıesin qalyptastyrý kerektigin kún tártibine shyǵardy.
Eń bastysy basqarý júıesindegi reformany Prezıdent aldymen ózinen bastaǵany Jańa Qazaqstanǵa degen senimdi kúsheıte tústi. Ásirese Memleket basshysynyń prezıdent ókilettiligin qysqartý jáne bir rettik merzimge saılaný týraly usynysy kóńilden shyqty. Buıyrtsa, kelesi jyly halyq qalaýlylary qaıta saılanyp, Úkimet qaıta jasaqtalsa, jańarǵan quramda Jańa Qazaqstandy qurý jolynda úlken eńbek bastalmaq. Sonymen birge prezıdenttik saılaýdy óz merzimin kútpeı aldyn ala ótkizý óte durys sheshim dep oılaımyn. О́ıtkeni alda turǵan reformalardy júzege asyrýda saıası jaǵdaılar kóńildi ózine aýdarmaý kerek. Ekinshiden saıası naýqandarmen júrip, ýaqytty ótkizip almaý da mańyzdy.
Prezıdenttiń barlyǵymyzdy erekshe tolqytqan sózi árıne, Ulttyq qordyń ınvestısııalyq tabysynyń 50 paıyzyn 18 jasqa tolmaǵan árbir qazaqstandyq balanyń jeke shotyna aýdarýy jaıynda boldy. Durys qoı, bala bizdiń bolashaǵymyz. Eldiń erteńgi egesi de solar. Sondyqtan birinshi kezekte solardyń durys tárbıelenip, qalyptasýyna, eshkimnen kem bolmaı ósýine jaǵdaı jasalýy kerek. Osy turǵydan alǵanda Prezıdenttiń mundaı sheshimi óz ýaqytynda jáne óte ádil boldy dep esepteımin.
Jalpy bıylǵy Joldaýda Qazaqstannyń jańa saıası-ekonomıkalyq, áleýmettik jáne quqyqtyq saladaǵy damýy tarıhymyzdyń taǵy bir kezeńiniń bastalǵanyn ańǵartty. Muny demokratııalyq jolǵa jasalǵan batyl qadam dep túsingenimiz abzal.
О́z kezeginde jýyrda Azamattyq alıans úkimettik emes uıymy Joldaýǵa baılanysty Úndeý qabyldap, osy boıynsha respýblıkanyń barlyq azamattyq qoǵam uıymdarymen birlesken konferensııa ótkizýdi uıǵaryp otyrmyz.
Jumaǵalı BILISBEKOV,
Shymkent qalasy Azamattyq alıansynyń tóraǵasy
Shymkent qalasy