Energetıka mınıstri Bolat Aqsholaqov ishki naryqty munaı ónimderiniń qajetti kólemimen qamtamasyz etý sharalary týraly aıtty, dep habarlaıdy Egemen.kz.
Aqsholaqovtyń aıtýynsha, bıyl Qazaqstanda munaı óńdeý jáne janar-jaǵarmaı óndirý kólemi artqan.
«2022 jylǵa arnalǵan munaı ónimderin óndirý boljamy 13,72 mln tonnany quraıdy, bul 2021 jylmen salystyrǵanda 1 mln tonnaǵa artyq. Aǵymdaǵy jyldyń 8 aıynyń qorytyndysy boıynsha dızeldik otyn óndirisi 3,53 mln tonnany qurady, bul 2021 jyldyń sáıkes kezeńimen salystyrǵanda 259 myń tonnaǵa nemese 10,5%-ǵa artyq», dedi mınıstrlik basshysy.
Basqarma basshysy 2022 jyldyń qyrkúıek aıynyń sońyna josparlanǵan óndiris kólemin eskere otyryp, munaı bazalaryndaǵy qaldyq 153 myń tonna deńgeıinde boljanǵanyn, barlyǵy 275 myń tonnany quraıtynyn atap ótti. Biraq soǵan qaramastan elde dızel otynynyń tapshylyǵy áli de baıqalady. Osyǵan baılanysty jaqyn arada Qazaqstanǵa Reseıden taǵy 100 myń tonna dızel otyny ákelinbek.
«Boljam boıynsha kólemi eki partııa, jalpy kólemi 100 myń tonnaǵa deıin jetedi. Bul kólem Reseı Federasııasynan bolatyny anyq. Jaqyn mańdaǵy basqa jetkizýshilerde mundaı kólemde dızeldik otyny joq. Munyń barlyǵy ındıkatıvtik teńgerimderge engizilgen», dedi Bolat Aqsholaqov Ortalyq kommýnıkasııalar qyzmetinde ótken brıfıngte.