«Syqıǵan SQ»... «Sosıalıstik Qazaqstan» kezinde bizdiń gazetke jamylatyn ataýlardyń bir sıpaty osylaı bolyp keletin. Memleketimiz halyqtyń memleketine aınala bastaǵanyn moıyndamaıtyndardyń, BAQ ataýly bılik bitkenge qalaıda oppozısııada turýǵa tıis dep sanaıtyndardyń sanatynan qazir de bizdiń basylymdy «ókimettiń gazeti» dep sóıleıtinder tabylyp qalady. Jurttyń bári birdeı japa-tarmaǵaı oqı bermeıtin bolǵandyqtan basqa gazetter basýdy oıyna da almaıtyn sala qulash zańdardy bet-bet etip jarııalap jatatynymyz ras, bılik tynysyn tanytatyn resmı dúnıelerge tıisinshe oryn berip turatynymyz da ras, sheneýnikterdiń az ǵana bir bóliginen basqa jan balasyna qajeti joq «Bos ákimshilik memlekettik laýazymdarǵa ornalasýǵa konkýrstar týraly habarlandyrýlarǵa» da oryn tabýǵa tıisti ekenimiz jáne ras. Onsyz bolmaıdy da. Bir jaǵynan, memleket saıasatyn uǵyndyrý mindetin eldiń bas basylymy moınyna almasa basqalar muny atqarmaıtyny aıdan anyq. Ekinshi jaǵynan, munyń ózi gazettiń oqyrman úshin tartymdylyǵyn tómendetýi múmkin ekendigin eskermeı taǵy tura almaımyz».
Bul joldardy «Etjeńdi» «Egemen Qazaqstan» - 2001» jınaǵyna alǵysózimizde jazǵan ekenbiz. Gazetti oqyrmanǵa jaqyndata túsýdiń joldaryn qarastyratynymyzdy aıta kelip, «Osy oraıda jasalyp jatqan sharalardyń arasynan jurtshylyq aı saıyn sońǵy aptanyń sársenbisinde taǵatsyzdana tosatyn «etjeńdi» nómirlerdi aldymen aıtýǵa bolar edi» degenbiz sonda. Odan beri de attaı zýlap on tórt jyl óte shyqty. Bul kezeńde «etjeńdi» elmen ábden etene bolyp, basylymnyń oqylymdylyǵyn anaǵurlym arttyra tústi. «Egemen Qazaqstan» taralymynyń búginde 200 myńnan asyp ketýinde aıtary myna ómirde qam-qareketi bir bitpeıtin de qoımaıtyn qym-qýyt tirshiliktiń aýmaǵynan asyp, keshegimizdi, búginimizdi, erteńimizdi baǵamdaıtyn, oı-órisimizdi keńeıtip, boı-óremizdi bıiktetetin turlaýly taqyryptardy altyn arqaý etýshi osyndaı nómirlerdiń úlesi úlken. El óńirlerindegi oqyrmandarmen kezdesýler kezinde «Etjeńdini» nege jıi shyǵarmaısyzdar? Aıdyń sońǵy sársenbisin kútip júremiz» degen syńaıdaǵy tilekterdi de talaı estigenbiz. Endi, mine, qalyń jurtshylyqtyń sol usynysyn da júzege asyrýdyń sáti túsip otyr. Búginnen bastap Siz, qadirmendi oqyrman, gazetimizdiń «etjeńdi» nómirlerin eki ret sársenbiniń sátinde – aı ortasynda jáne aıdyń sońǵy aptasynda qolǵa alatyn boldyńyz. Bul nómirler de, árıne, bas gazet qamtıtyn, qamtýǵa tıisti kúndelikti kókeıkesti máselelerdi atymen aınalyp óte almaıtyny anyq, ózge jumysymyzdy jóndem júrgizýge jaǵdaı jasaıtyn jarnamanyń járdeminen de bas tartatyn jaıymyz jáne joq. Sonyń ózinde de «etjeńdi» nómirlerdiń tanymdyq jýrnalıstıka qaǵıdattaryna qurylǵan bolmys-bitimi, tartymdylyqty, qyzyqtylyqty aldymen qamdaıtyn qalpy, gazettiń ózin jata-jastana oqıtyn qazaqy ólshemge eseppen keńdeý pishilgen bettelý máneri erkindeý taqyryptarǵa endep enýge múmkindik bereri kúmánsiz. Sóz sońynda budan bylaı aıyna eki ret shyǵatyn «etjeńdige» ıelik etetin «Rýhanııat» shyǵarmashylyq tobyna tikeleı basshylyq jasaý aksıonerlik qoǵamnyń vıse-prezıdenti – bas redaktor, qazaqtyń kórnekti qalamgeri Janbolat Aýpbaevqa júktelgenin qosa aıtpaqshymyz.
Sóıtip, endi «etjeńdi» elmen etelene túspekshi. Onyń qadamy qaıyrly bolaryna senemiz. О́ıtkeni, biz oqyrmandarymyzdyń qazaq tarıhyndaǵy taǵylymdy jaılarǵa qanyqqysy keletinine, Alash ardaqtylarynyń ǵıbratty ǵumyryna perzenttik júrekpen kóńil bóletinine, álemdegi, eldegi eleýli úderisterdiń mánine azamattyq belsendilikpen qyzyǵa beretinine senemiz. Qyzyqty maqalalaryn dámdi dúnıeleriniń 200 myńnan astam oqyrmanǵa jetýine jaǵdaı jasaıtyn «Egemen Qazaqstanǵa» usynatyn avtorlar qatarynyń qalyńdaı túsetinine de senemiz. Alashqa aıtary bar azamattardyń bárin redaksııamen tyǵyz baılanysqa shaqyramyz.
Saýytbek ABDRAHMANOV.