Mádenıet jáne sport mınıstrligi rezervten qarajat bólý týraly Úkimet qaýlysynyń jobasyn ázirledi, dep habarlaıdy Egemen.kz.
«Mádenıet jáne sport mınıstrligine 2022 jylǵa arnalǵan respýblıkalyq bıýdjette shuǵyl shyǵyndarǵa kózdelgen Úkimet rezervinen Brazılııanyń Kashıas-dý-Sýl qalasynda 2022 jylǵy XXIV jazǵy Sýrdlımpıada oıyndarynda joǵary nátıjelerge qol jetkizgen sportshylarǵa jáne olardyń jattyqtyrýshylaryna birjolǵy tólemderdi júzege asyrý úshin 3 610 586 265 teńge mólsherinde aqshalaı qarajat bólinsin», delingen qujatta.
Tizimge barlyǵy 80 sportshy, sondaı-aq olardyń jattyqtyrýshylary da kirdi.
Dzıýdoshylar Áldibek Nurmuhammed pen Anna Kramorova 66 957 000 teńgeden tólem alady. Olardyń jeke jattyqtyrýshylary 53 565 600 teńgeden jáne alǵashqy jattyqtyrýshylary 6 695 700 teńgeden alady.
60 kelige deıingi salmaq dárejesinde kúmis medalǵa ıe bolǵan Áldibek Nurmuhammed komandalyq jarysqa qatysqany úshin 33 123 000 teńge alady.
Anna Kramorova 78 keli salmaq dárejesinde kúmis medal jeńip alǵan edi.
100 keli salmaq dárejesinde qola medal alǵan Sabyrjan Hapızov 33 478 500 teńge, al onyń jattyqtyrýshylary tıisinshe 26 782 800 jáne 3 347 850 teńge syıaqy alady. Sportshy ekinshi marapat úshin qosymsha 33 123 000 teńge alady.
Jeńil atlet Olga Hıjnıakova birden birneshe tólem alady, sebebi ol birneshe marapatqa ıe boldy. Oǵan kúmis jáne qola medaldar úshin 65 170 500, 32 585 250 jáne 12 835 200 teńge tólenedi.
Altyn medaldarǵa qol jetkizgen Shonký Haırathaan (grek-rım kúresi) men Farhad Qystaýbaev (jeńil atletıka) 108 617 500 jáne 110 652 500 teńgeden eń úlken tólemder alady. Sonymen qatar, sportshylar jarystaǵy basqa jetistikteri úshin qosymsha syılyqtarmen de marapattaldy.
Sportshylar men tıesili tólemderdiń barlyq tizimi 20-shy qyrkúıekke deıin «Ashyq NQA» saıtynda ornalastyrylǵan.