El Prezıdenti Qasym-Jomart Toqaev Joldaýda eń aldymen halyqtyń áleýmettik-ekonomıkalyq jaǵdaıyn jaqsartý týraly aıtyp, saıası máselelerge keńinen toqtaldy. Sonyń ishinde, Memleket basshysy el ekonomıkasyn kóterý maqsatynda shaǵyn jáne orta bıznes ókilderin qoldaý jalǵasatynyn atap ótti.
Kásipkerlerge arnalǵan kredıttik resýrstardy ulǵaıtý qolǵa alynyp, jańa salyq, bıýdjet kodeksteri ázirlenbek. Aldaǵy ýaqytta 6 jasqa deıingi balalardy tolyq bala-baqshamen qamtamasyz etý máselesi sheshimin tabady. Prezıdent tárbıeshilerdiń statýsyna kóńil bólip, olardyń aılyq jalaqysyn kóbeıtý qajettigin kóterdi. Men bul bastamalardy tolyq qoldaımyn.
Sonymen qatar erekshe atap ótetin jaǵdaı Prezıdent densaýlyq saqtaý salasyndaǵy ózekti máselelerdi jedel sheshý kerektigin aıtty. Sol úshin dáriger jáne osy sala máselelerin biletin maman retinde zor alǵysymdy bildiremin. Qazirgi kúni medısına salasyn qarjylandyrý óte ózekti másele bolyp otyr. Qarjylandyrýdyń mardymsyzdyǵynan keıbir medısına mekemeleri kadrlyq qysqartý júrgizýge májbúr.
Medısınalyq qyzmetkerlerdiń jalaqysy keshiktirilip jatqan jaǵdaılar da bar. Kommýnaldyq qyzmetterge, dári-dármekterge tólem jasaýǵa sondaı-aq, medısınalyq uıymnyń jeke damýyna qarajat qalmaýda. Prezıdent medısınalyq saqtandyrý modelin qaıta qaraý máselesine toqtaldy. Bul – óte oryndy másele. Medısınalyq saqtandyrý arqyly azamattar tolyqqandy dárigerlik kómek ala almaı otyrǵandyǵy búginde eshkimge jasyryn emes.
Joldaý kezinde el boıynsha 650 aýylǵa jańa medısınalyq pýnktter ashylyp, 32 aýdandyq aýrýhana janynan jansaqtaý bólimderi jáne ınsýlt ortalyqtary uıymdastyrylatyny aıtyldy. Bul mekemeler 4 mln jýyq halyqty qamtıdy. Sondaı-aq medısınalyq JOO janynan kópsalaly klınıkalar jumysyn bastaıdy.
Prezıdent qańtar oqıǵasynda jappaı tártipsizdikti uıymdastyrýǵa qatyspaǵan, bılikti kúshpen basyp alýǵa jáne memleketke opasyzdyq jasaýǵa qatysy joq azamattarǵa bir rettik raqymshylyq jasaý týraly sheshim qabyldady. «Qasiretti qańtar» oqıǵalaryna qatysqan azamattar men olardyń jaqyndarymen kezdesip, pikirlesken kezde biz de talaı jaıtqa qanyqqan edik. Osyǵan oraı Prezıdenttiń gýmanızm prınsıpin ustanyp, jaýapkershiligi mol sheshim qabyldaǵanyna erekshe qýandym.
Joldaýda aıtylǵan mańyzdy máselelerdiń biri – Qazaqstan Respýblıkasy Prezıdenti jáne Májilis pen máslıhat depýtattarynyń saılaýy merziminiń jarııalanýy. Jańa erejege sáıkes azamattar jeke jáne partııa atynan kandıdatýrasyn usyna alady.
Memleket basshysynyń Joldaýdaǵy aıtqan bastamalardyń barlyǵy taǵdyrsheshti máseleler. Sol sebepti de Prezıdentpen birge barsha qazaqstandyqtardy Ádiletti Qazaqstannyń damýyna úles qosýǵa shaqyramyn.
Gúldara NURYMOVA,
Májilis depýtaty