Nıý-Iorktegi US Open týrnıriniń eresekter saıysynda birde-bir tennısshimiz qalmady. Sol sebepti de qazaqstandyq jankúıerlerdiń nazary jasóspirimder saıysyna aýdy.
Atalǵan jarystyń jekelgen básekesinde Arýjan Saǵyndyqova óner kórsetti. Irikteý synynan súrinbeı ótken 17 jasar qazaq qyzy alǵashqy aınalymda Lıv Hovdemen sheberlik baıqasty. AQSh-tyń asa daryndy oıynshysy bıyl jasóspirimderdiń Ýımbldon týrnıriniń fınalyna deıin jetti. Sonymen qatar Lıv basqa da jarystarda eleýli tabystarǵa qol jetkizdi. Osynyń barlyǵyn elegen uıymdastyrýshylar Hovdege Nıý-Iorktegi dodaǵa qatysýyna Wild Card (WC) bergen edi. Biraq tusaýkeser kezdesýde ol ózinen áldeqaıda tájirıbeli Qytaı tennısshisi Van Szıannan utyldy.
Nebári 56 mınýtqa sozylǵan Saǵyndyqova men Hovde arasyndaǵy tartys 6:1, 6:3 esebimen amerıkalyq oıynshynyń paıdasyna sheshildi.