Memleket basshysy Ulybrıtanııa Premer-mınıstri Lız Trassqa quttyqtaý jedelhatyn joldady, dep habarlaıdy Egemen.kz Aqordanyń resmı saıtyna silteme jasap.
Qasym-Jomart Toqaev Qazaqstan halqynyń jáne jeke óziniń atynan Lız Trassty Ulybrıtanııa jáne Soltústik Irlandııa Birikken Koroldiginiń Premer-mınıstri bolyp taǵaıyndalýymen quttyqtady.
Prezıdent óziniń quttyqtaýynda Lız Trass úkimetti basqarǵan kezeńde Ulybrıtanııa budan da gúldengen jáne ornyqty memleket qurý jolynda tabandy túrde ilgerileı beretinine senim bildirdi.
«Qazaqstan Ulybrıtanııamen berik dostyq baılanystarǵa, ortaq qundylyqtar men basymdyqtarǵa negizdelgen ári uzaq jyldar boıy qalyptasqan strategııalyq seriktestikti joǵary baǵalaıdy. Qazaq-brıtan kópqyrly qarym-qatynasyn odan ári nyǵaıtý jáne ózekti jahandyq máseleler boıynsha ustanymdarymyzdy úılestirý úshin tyǵyz yntymaqtastyqqa daıyn ekenimdi jetkizgim keledi», dep jazylǵan Prezıdent joldaǵan jedelhatta.