Dúısenbi kúni Almatydaǵy balalar úılerinde tárbıelenip jatqan daryndy balalar “Maks” dybys jazý stýdııasyna keldi. Bul jerde talantty balalar tanymal kompozıtor jáne balalarǵa arnalyp jazylǵan birqatar ánderdiń avtory Maqsat Jáýtikovpen birigip, 1 maýsym – Balalardy qorǵaý kúnine oraı ótetin “Meıirim” festıvaliniń ánuranyn jazdy.
– Biz “Meıirim” baıqaý-festıvalin jyl saıyn ótkizip kelemiz. Bıyl bul isti Qazaqstannyń Azamattyq alıansymen birlesip qolǵa aldyq, ıaǵnı endigi jerde bizder – bir komandamyz. Biz úshin balalarmen, elimizdiń keleshegimen birge bolyp, talantty oryndaýshylarmen shyǵarmashylyq odaq quryp, rýhanı ósip, damyǵanymyz asa mańyzdy, – dedi Marat Ospanov atyndaǵy qoǵamdyq qordyń ókili Elnur Jáshimova. Sondaı-aq aksııa aıasynda respýblıkalyq jáne halyqaralyq baıqaýlardyń júldegeri, “Tamshylar” atty balalar mýzykalyq ujymynyń jetekshisi Maqsat Jáýtikov sheberlik-synyptaryn ótkizdi. Taǵdyrdyń teperishine týmaı jatyp tússe de, talanttan kende qalmaǵan balalar sahnalyq sheberliktiń, vokal men rıtmıkanyń qyr-syrlary týraly dárister alyp, ýaqyttaryn asa áserli ótkizdi. Olardyń barlyǵy derlik kásipqoı án jazý stýdııasynyń tabaldyryǵyn tuńǵysh ret attady. Bolashaqta osylardyń ishinen oza shyqqan naǵyz úzdikter ónerdiń jalyna túpkilikti jarmasýy ǵajap emes. – Elimizdiń tanymal ónerpazdarymen jáne talantty mýzykanttarymen mundaı festıvalderdi, sheberlik-dáristerin ótkizý damý erekshelikteri basqa jaǵdaıda júrip jatqan jetim balalardyń qabiletterin tanyp, damytýǵa múmkindik beredi. Bul bastamalar shekteýler men shekaralardy joıyp, barlyǵyna teń jaǵdaı týdyrady. О́ıtkeni, bárimiz de birgemiz jáne bizder bir komandamyz, – dedi qordyń dırektory Baqyt Ospanova. Aınash ESALI, Almaty. Sýretti túsirgen Borıs BÝZIN.