Jýyrda VII Baiqonyr International Short Film Festival-niń saltanatty ashylý rásimi ótti, dep habarlaıdy Egemen.kz.
«Baıqońyr» - Qazaqstandaǵy tuńǵysh halyqaralyq qysqametrajdy fılmder kınofestıvali. Ol jeti jyldan beri Qazaqstanda ǵana emes, sonymen qatar sheteldiń jas kınematografısterine de qoldaý kórsetip keledi.
Festıval jyldyń kópten kútken premeralarynyń biri - Ulttyq kınony qoldaý memlekettik ortalyǵynyń qarjylaı qoldaýymen Aray Media Group kompanııasy túsirgen «Dos-Muqasan» kınotýyndysymen ashyldy. Atalmysh fılmniń rejısseri Aıdyn Sahaman.
«Bizdiń fılmniń alǵashqy resmı kórsetilimi osyndaı keremet kınofestıvaldiń aıasynda bolǵanyna qýanyshtymyz. «Baıqońyr» - bul jańa esimderdi ashatyn jáne Qazaqstannyń shyǵarmashyl jastaryna qoldaý kórsetetin festıval. Biz úshin bul óte mańyzdy, sebebi, «Dos-Muqasan» tobynyń shyǵarmashylyǵy da stýdenttik kezden bastaý aldy. Jastyq shaq - shyǵarmashylyq úshin tamasha kezeń jáne bizdiń fılm jas urpaqqa jaqsy úlgi bolady dep senemiz», dedi fılminiń bas prodıýseri Aıgúl Baıbek.
Festıval baǵdarlamasyna UKQMO-ǵy qoldaý kórsetken taǵy tórt fılm endi. Ulttyq baıqaýǵa Begaly Shıbikeevtiń «Qus» qysqametrajdy fılmi, al Dılshat Rahmatýllınniń «Besik jyry» týyndysy anımasııalyq baıqaýǵa qatysady. Al rejısser-anımator Ivan Ardashovtyń «Kenje qyz» anımasııalyq serıaly men Generation seksııasynda Berlın Halyqaralyq kınofestıvaliniń Gran-prı ıegeri Farhat Sháripovtyń «Shema» atty fılmi konkýrstan tys baǵdarlama aıasynda kórsetiledi.
Forým seriktesteri AlmaU «Medıa jáne kıno mektebi» jáne Qazaqstannyń kınosynshylar qaýymdastyǵy festıval barysynda óziniń «Synshylar tańdaýy» jyl syılyǵyn tabystaıdy dep kútilýde.
«Qazaqstan kınosynshylar qaýymdastyǵy 2015 jyly quryldy. Onyń quramyna 16 otandyq kınosynshylar men kınotanýshylar kiredi. Bıyl «Synshylar tańdaýy» syılyǵy 2020-2021 jyldary shyǵarylǵan qazaqstandyq fılmderge 13 nomınasııa boıynsha beriledi, sebebi pandemııaǵa baılanysty syılyq bir jyl berilmegen edi», dedi Qaýymdastyq prezıdenti, ónertaný doktory Gúlnar Ábikeeva.
Aıta ketsek, festıvaldiń konkýrstyq baǵdarlamasyna qatysýǵa 306 kınojoba úmitker boldy. Onyń ishinde baǵdarlamalyq qyzmet jeti elden: Qazaqstan, О́zbekstan, Qyrǵyzstan, Ázerbaıjan, Tájikstan, Armenııa jáne Reseıden 48 fılmdi iriktep aldy. Úsh konkýrsta – halyqaralyq, ulttyq jáne anımasııalyq baıqaýlarda usynylǵan kartınalardy bedeldi kınoekspertterden quralǵan qazylar alqasynyń úsh komandasy baǵalaıdy. Al halyqaralyq baıqaýdyń qazylar alqasyn Gúlnar Ábikeeva basqardy. Ulttyq baıqaýdyń qazylar alqasynyń tóraǵasy - Saha respýblıkasynyń tanymal rejısseri Edýard Novıkov. Anımasııalyq baıqaýdyń qazylar alqasynyń jumysyn tobyn Batýmıdegi Tofuzi Halyqaralyq anımasııa festıvaliniń dırektory Zýrab Dıasamıdze basqarady.
«Bıyl festıval baǵdarlamasyna ataqty kınotanýshylardyń dáristeri men belgili rejısserdiń sheberlik sabaǵyn engizdik. Bizdiń sarapshylar kún saıyn baıqaý baǵdarlamasynyń fılmderin, sondaı-aq konkýrstan tys kórsetiletin týyndylardy talqylaıdy», deıdi kınofestıval Prezıdenti Ánýar Kenjebaev.
Sondaı-aq, bıylǵy festıvalge Qyrǵyzstannan «Ekspedısııa» qozǵalysynyń ókilderi keledi. Bul qozǵalys óz eliniń búgingi ómiri týraly qysqametrajdy fılmder túsiretin 50-ge jýyq rejısserdi biriktirgen.
«Baıqońyr» festıvali 11 qyrkúıek kúni Darejan О́mirbaevtyń «Sońǵy seans» atty fılminiń kórsetilimimen aıaqtalady, onyń álemdik premerasy Lokarnodaǵy 75-shi mereıtoılyq festıvalde ótti.
Dástúrli túrde Baiqonyr festıvaliniń uıymdastyrýshysy elimizdiń jetekshi kınoportaly – «Brodveı» (brod.kz). Festıval TMD-ǵa qatysýshy memleketterdiń Memleketaralyq gýmanıtarlyq yntymaqtastyq qorynyń qoldaýymen ótedi. Aqparattyq qoldaýdy «Kazakh Tourism» ulttyq kompanııasy» AQ kórsetedi.
Festıvaldiń aqparattyq seriktesteri «Habar» jáne El Arna telearnalary, «Juldyz FM» jáne «Eldoradıo Almaty» radıostansııalary, Tengrinews.kz, Massaget.kz, Baribar.kz, 365 Info.kz, «Ekspress K» ınternet portaldary, Egemen Qazaqstan, «Kazahstanskaıa pravda», Almaty Aqshamy, «Vechernıı Almaty» jáne «Komsomolskaıa pravda Kazahstan» basylymdary.