Premer-Mınıstr Álıhan Smaıylovtyń tóraǵalyǵymen ótken Qazaqstannyń Sý keńesiniń otyrysynda sý salasyn keshendi damytý boıynsha josparlar qaraldy, dep habarlaıdy Egemen.kz.
Ekologııa, geologııa jáne tabıǵı resýrstar mınıstri Serikqalı Brekeshev taıaýda Memleket basshysynyń halyqqa Joldaýynda belgilengen mindetterdi oryndaý úshin sý salasyn damytýdyń úsh jyldyq keshendi jospary ázirlenip jatqanyn habarlady.
Onyń aıasynda jańa Sý kodeksin ázirleý bastaldy, transshekaralyq ózender boıynsha kelissózder prosesinde Qazaqstannyń pozısııasyn nyǵaıtý jáne sý resýrstaryn basqarý júıesin damytýdyń 2023-2030 jyldarǵa arnalǵan tujyrymdamasyn bekitý josparlanyp otyr.
Budan basqa, aýyl sharýashylyǵy óndirýshilerin sý únemdeý tehnologııalaryn paıdalanýǵa yntalandyratyn tetikter ázirlenedi, sý sharýashylyǵy ınfraqurylymyn jańǵyrtý jáne sý qoımalaryn salý jumystary jandanady, magıstraldyq jáne sharýashylyqaralyq sýarý kanaldaryn Biryńǵaı sıfrlyq esepke alý júıesi damıdy.
Sonymen qatar Qazaq sý sharýashylyǵy ǵylymı-zertteý ınstıtýtyn kúsheıtý jáne ony sý resýrstary problemalary jónindegi salalyq ǵylymı ortalyq retinde belgileý, sondaı-aq sý salasynda suranysqa ıe mamandardy daıarlaý úshin bazalyq joǵary oqý ornyn aıqyndaý josparda bar.
Premer-Mınıstr atalǵan tásilderdi qoldap, ár baǵytty sapaly pysyqtaýdyń mańyzyn atap ótti. Sonymen qatar Álıhan Smaıylov salany damytýdyń jańa josparyn ázirleýdi jedeldetýdi jáne ony osy jyldyń qarasha aıynda qaraýǵa engizýdi tapsyrdy.
«Sý únemdeýdi yntalandyrýdyń tıimdi tetikterin ázirleý, kezeń-kezeńmen sý qoımalaryn rekonstrýksııalap, salý qajet. Mindetti túrde sý resýrstaryn basqarýdy sıfrlandyrý jáne avtomattandyrý jónindegi jumysty keńeıtý mańyzdy, sebebi bul – osy saladaǵy tıimdilikti arttyrýdyń negizgi ádisteriniń biri», dedi Álıhan Smaıylov.
Otyrysqa qatysýshylar Aqtóbe, Jambyl jáne Túrkistan oblystarynda ırrıgasııalyq júıelerdi qalpyna keltirý boıynsha EQDB-men birlesken jobalardy iske asyrýdyń ózekti máselelerin qarastyrdy.