Elordada óńirlerdiń aýyl sharýyshylyǵy ónimderin óndirýshilerdiń jármeńke maýsymy jalǵasýda. Dástúr boıynsha, bul demalys kúnderi Qyzylorda oblysynyń kásipkerleri ónimderin jetkizdi, dep habarlaıdy Egemen.kz qala ákimdiginiń resmı saıtyna silteme jasap.
Oblystyń aýyl sharýashylyǵy óndirýshileri óz ónimderin deldalsyz tikeleı satady, sonyń nátıjesinde ónimniń baǵasy 10-20%-ǵa tómen.
Ár demalys kúni tańerteńnen elordalyqtar qaladaǵy basty jármeńkege asyǵady. Ondaǵy maqsat – endi pisken kúzgi baqsha ónimderin alý. Al búgin qyzylorda óńiriniń aq marjany, araldyń balyǵy saýdany qyzdyrdy. Mundaǵy sary maı, irimshik, qurt, et pen shujyq jáne kókónister naryqtyq baǵadan 15-20 paıyz tómen saýdalanýda. Jalpy, elordadaǵy aýyl-sharýashylyǵy ónimderiniń jármeńkesine Qyzylorda oblysynan 500 tonnadan astam ónim jetkizildi.
«Qyzylorda oblysynan jármeńkege 70-ten asa kásipkerler qatysyp otyr. 500-den asa taýar, aýyl sharýashylyǵy ónimderin ákelip otyr. Jármeńke negizi qaladaǵy azyq-túlikti qamtamasyz etýge, baǵany turaqtandyrýǵa baǵyttalǵan. Qazaqstannyń barlyq oblystarynyń qatysýymen bolady. Qarasha aıyna deıin jalǵasady. Kelesi aptada Almaty oblysy men Jetisý oblystarynyń aýyl sharýashylyǵy ónimderin kútip otyrmyz. Ár senbi-jeksenbi saıyn kezekpen oblystar kelip otyrady», dedi qalalyq Investısııalar jáne kásipkerlikti damytý basqarmasy basshysynyń orynbasary Qýanysh Saparov.
Jármeńkede aımaqta óndiriletin otandyq ónimderdi qoldaý maqsatynda arnaıy aýyl sharýashylyǵy ónimderiniń kórmesi uıymdastyrylǵan.
Syrdyń dıhandary men kásiporyndary 50 júk avtokóligimen jalpy quny 200 mln teńgeni quraıtyn 500 tonnadan astam ónim túrlerin elordaǵa jetkizdi. Onyń ishinde 100 tonna kúrish, 15 tonna et jáne 30 tonna balyq ónimderi, 80 tonna kókónis pen jemis-jıdekter, 210 tonna baqsha ónimderi, 50 tonna asqabaq, 3 tonna as tuzy, 10 tonna sút ónimderi, 5 tonnaǵa jýyq kondıter ónimderi qoıylǵan.
«Búgingi jármeńkege úsh túrli buqtyrylǵan et, eki túrli kúrish, qaraqumyq jáne asqabaq, sábiz shyrynyn, balalar taǵamyn ákeldik. Olardyń barlyǵy – esh qospasyz, ekologııalyq taza, sapasy joǵary ónimder. Qoljetimdi arzan baǵamen satyp jatyrmyz. Halyqqa taza tabıǵı ónim usyný – tehnolog retindegi basty qaǵıdam. Munda adamdar kóptep kelýde. Usynyp otyrǵan baǵamyz olardyń kóńilinen shyǵýda», deıdi Qyzylorda oblysyndaǵy bas tehnolog Qýat Shakızbaev.
Jármeńkege kelýshiler Qyzylorda oblysynyń brendine aınalǵan aq kúrishi men balyǵyn, as tuzy, qaýyny men qarbyzyn qyzyǵýshylyqpen alyp jatyr.
«Elordada apta saıyn ótetin óńirlerdiń aýyl sharýashylyǵy jármeńkesin jibermeı kelip turamyn. Qala turǵyndary úshin Qyzylordanyń brendine aınalǵan kúrish kelip jatyr. Maı men shubatta aldym. Shubattyń lıtri 1000 teńgeden eken. Baǵasy óte qoljetimdi dep oılaımyn. Munda Qazalynyń kámpıtteri, táttileri jáne balyq ónimderi de bar eken. Arzan baǵamen qaýyn-qarbyz da aldym. Sondaı-aq, munda kórme uıymdastyrylyp jatyr. Kórmede usynylǵan tamaqtyń dámin tatyp kórip, unasa alýǵa bolady. Barlyǵy halyqtyń qamy úshin jasalyp jatyr. Nur-Sultan qalasy ákimdigine turǵyndardyń jaǵdaıyn oılap, osyndaı jármeńkeler uıymdastyryp jatqandaryna alǵysymyzdy bildiremiz», deıdi qala turǵyny Aınur Jumataeva.
Sonymen qatar, jármeńkede Qyzylordalyq ónerpazdar ánnen shashý shashyp, elordalyqtarǵa kóterińki kóńil-kúı syılaýda.
Jármeńke aıasynda Qyzylorda oblysy ákimdiginiń bastamasymen qaıyrymdylyq is-sharasy uıymdastyrylyp, kómekke muqtaj otbasylarǵa azyq-túlik sebetterin taratty.
«Búgingi aksııa boıynsha Qyzylorda oblysynan azyq-túli toltyrylǵan 80 sebet berildi. Onyń ishine 10 keli kúrish, 2 keli makaron, 5 keli kartop, 5 keli pııaz, asqabaq jáne qaýyn 1 danadan salyndy. Bul aksııaǵa Saryarqa aýdany ákimdiginen volonterler qatysty. Barlyq azyq-túlik sebeti turmysy tómen, áleýmettik osal toptaǵy tıisti adamdarǵa jetkiziledi. Bul aksııa Nur-Sultan qalasy ákimdiginiń qoldaýymen ótip jatyr.Meılinshe kóp otbasyny qamtýǵa tyrysýdamyz. Jármeńke joǵary deńgeıde ótýde», deıdi qalalyq ákimdiktiń ókili Erasyl Qaıratov.
Esterińizge sala keteıik, jármeńke eki kúnge sozylady – 10 jáne 11 qyrkúıek kúnderi. О́tetin orny: Turan, 48 mekenjaıy boıynsha ornalasqan «Astana-Arena» stadıonynyń janyndaǵy alań.