Elordadaǵy Dostyq úıinde «Qazaqstan máslıhattary depýtattarynyń birlestigi» RQB Ortalyq keńesiniń otyrysy ótti. Alqaly jıynda Prezıdent Qasym-Jomart Toqaevtyń «Ádiletti memleket. Birtutas ult. Berekeli qoǵam» atty Joldaýy keńinen talqylandy.
Is-sharaǵa Senat pen Májilis depýtattary, Úkimet músheleri men ortalyq memlekettik organdar basshylary, Nur-Sultan, Almaty, Shymkent qalalary men oblystar máslıhattarynyń hatshylary, BAQ jáne azamattyq qoǵam ókilderi qatysty.
«Memleket basshysy halyqqa Joldaýynda «Bizdiń búgingi bastamalarymyz Qazaqstannyń bolashaǵyn aıqyndaıdy. Biz kún saıyn eski men jańanyń, toqyraý men damýdyń arasynan tańdaý jasaımyz. Barshańyzdy ult múddesi úshin uıysýǵa shaqyramyn» dep, halyqty Ádiletti Qazaqstandy birge qurýǵa shaqyrdy. Sońǵy kúrdeli jaǵdaılarǵa baılanysty aımaqtardyń jalpyeldik strategııalyq baǵyttarǵa jumys isteý mańyzdylyǵy burynǵydan da artty», dedi birlestik tóraǵasy Tóleýbek Muqashev.
«Halyqtyń ál-aýqatyn kóterýge baǵyttalǵan tyń baǵdarlamalar usynylǵan bul Joldaý ıgilikti bastamalardyń bastaýy, jarqyn bolashaqtyń nyshany bolary sózsiz. Shynynda, endi biz Jańa Qazaqstandy qurý úshin el tarıhyndaǵy eleýli oqıǵaǵa beıjaı qaramaı, birligimiz ben yntymaǵymyzdy, tatýlyǵymyz ben turaqtylyǵymyzdy jáne ózara aýyzbirshiligimizdi kózdiń qarashyǵyndaı qasterlep, jumyla jumys isteýimiz qajet», dedi ol.
Sondaı-aq spıkerdiń aıtýynsha, bul Joldaý saıası reformalardy jáne jańa ekonomıkalyq saıasatty iske asyrý, aýyl sharýashylyǵy, medısına, bilim berý júıesin damytý, eń tómengi jalaqy deńgeıin kóterý, zeınetaqy júıesin jańǵyrtý, qoǵamda zań ústemdigin berik ornatý syndy máselelerdi kóterip qana qoımaı, aldaǵy ýaqyttaǵy el óńirleriniń saıası-áleýmettik, ekonomıkalyq damý vektoryn aıqyndap berdi.
Premer-Mınıstr keńsesiniń uıymdastyrý jumystary jáne aımaqtyq damý bólimi meńgerýshisiniń orynbasary Ryskeldi Sátbaev jıynda aǵymdaǵy kóp túıtkildi sheshýdiń kilti jergilikti ózin-ózi basqarýda ekendigine toqtaldy. Iаǵnı aımaq halqynyń qalaýyn, yqtııaryn bildiretin jáne jalpy memlekettik múddeni eskere otyryp, qabyldanǵan sheshimderdi júzege asyrý sharalaryn belgileıtin ári atqarylý barysyn baqylaıtyn máslıhattardyń buǵan barynsha atsalysýy asa mańyzdy. Basqosýda Senat pen Májilis depýtattary salalyq máselelerdi kóterse, óńirlerdiń máslıhat basshylary aımaqtardaǵy ahýalǵa sholý jasap, Joldaý aıasynda óz aýmaqtarynyń qandaı jumystar atqarýǵa kiriskenin jetkizdi.
Bul rette Ulttyq ekonomıka vıse-mınıstri Baýyrjan Omarbekov «QR jergilikti ózin-ózi basqarý týraly» arnaıy Zańyn qabyldaý baǵytyndaǵy jumystardy baıandady.
«2018 jyldan bastap qoldanystaǵy bıýdjet zańnamasynyń ózgeriske ushyraǵany málim. Buryn bıýdjettik júıe úsh deńgeıden quralyp, aýyldyq okrýgter aýdandyq bıýdjetten qarjylandyryldy. Qazir 4 deńgeıli júıege aýysyp, ár aýyldyq okrýgtiń jeke bıýdjeti bar. Budan ózge negizgi qujat – jergilikti ózin-ózi basqarýdyń 2025 jylǵa deıingi damý Tujyrymdamasy qabyldandy. Byltyr aýyl ákimderin tikeleı saılaýy úderisi de engizildi. Qazir aýdan ákimderin tikeleı saılaýdy engizý jumystary júrgizilýde. Oǵan da tıisti zań jobasy Parlamentke usynyldy. Mundaǵy jańalyq – aýdandar ákimderiniń tikeleı saılaýyn ótkizýdi 2023 jyldan bastap 2025 jylǵa deıin kezeń-kezeńimen bastaý josparlanyp otyr. Ondaǵy negizgi talaptary men tásilderi aýyl ákimderiniń saılaýyna uqsaıdy», dedi zań talaptaryn keńinen túsindirip ótken vıse-mınıstr.
Onyń aıtýynsha, zań jobasy birinshi kezekte memlekettik basqarýdyń joǵary deńgeılerine táýeldilikti tómendetýine baǵyttalǵan. Atap aıtqanda, munyń sıpaty azamattardyń ashyq daýys berýi arqyly tórt jyl merzimge jergilikti ózin-ózi basqarýdyń ókildi organdary – keńesterdiń qurylýynan kórinbek.
Is-shara sońynda qatysýshylar Memleket basshysynyń Joldaýy boıynsha barsha qazaqstandyqtarǵa Úndeý jasady.
«Búgingi geosaıası ahýal – kez kelgen memleket úshin syn. Osy syndy ótkere alǵan, ótkerip qana qoımaı, bul syndardan kúsheıip shyqqan memlekettiń bolashaǵy jarqyn, erteńi eńseli, tuǵyry bıik bolary sózsiz. Sondyqtan zaman aǵymynan qalmaı damýdyń dańǵyl jolyna túsemiz desek, halyqtyń ál-aýqaty men saıası ómirine oń ózgerister alyp kelýge baǵyttalǵan, úlken ózgeristerge bastaıtyn, elimizdiń órkendeýine jańa serpin jáne ekpin beretin strategııalyq mańyzy bar qujat – Joldaýda aıtylǵan mindetterdi iske asyrýǵa barshamyz atsalysyp, jumyla eńbek etýimiz kerek», delingen Úndeý mátininde.
Aıta keteıik, Qazaqstan máslıhattary depýtattarynyń birlestigi – eldegi barsha máslıhat ókilderiniń basyn qosqan biregeı uıym.