Aqparat jáne qoǵamdyq damý mınıstri Darhan Qydyráli Almatyǵa sapary barysynda BAQ ókilderimen kezdesip, medıa zańnamany qaıta qaraýdyń jańa tásilderi týraly pikir almasty. Jıynǵa telearnalar, baspa basylymdary jáne ınternet resýrstardyń ókilderi qatysty.
Jıynda mınıstr talǵamy men talaby joǵary, áleýmettik jeli men ınternet resýrstarǵa kóp kóńil bóletin oqyrmannyń suranysyna jaýap berý qıyn ekenin aıta kelip, baspa basylymdaryna salyq jeńildikterin berý jaǵyn jeke talqylaý qajettigin alǵa tartty. Onyń aıtýynsha, qazirgi ýaqytta baspa basylymdarǵa salyqtyq jeńildikterdi alyp tastaý usynysyn Úkimetke engizý úshin tıisti taldaý júrgizilip jatyr. «Baspasóz salyqtardan jáne mindetti aýdarymdardy tóleýden bosatylǵan jaǵdaıda, únemdelgen qarajatty basylymdardyń materıaldyq-tehnıkalyq bazasyn jańartýǵa, kontent sapasyn jaqsartýǵa jumsaýǵa múmkindik týady», dedi mınıstr.
Kezdesý barysynda BAQ arqyly memlekettik ıdeologııalyq qaýipsizdik máselesin kóterý, baspa basylymdardy satý oryndaryn kóbeıtý, gazet oqý mádenıetin jandandyrý, kıno arqyly gazet oqý mádenıetin nasıhattaıtyn álemdik tájirıbeni engizý máseleleri sóz boldy. Qazirgi ýaqytta óńirler men iri qalalarda baspa ónimderi 400 gazet dúńgirshegi, sýpermarketter jáne iri dúkenderdegi jeke saýda núkteleri, «Qazposhta» AQ-nyń 2 645 qalalyq jáne aýdandyq poshta baılanys bólimshesi arqyly satylady.
«Birqatar óńirde «kóshe saýdasy» tujyrymdamasyn iske asyrý boıynsha jumys júrgizilýde, onyń sheńberinde kásipkerler jer ýchaskelerin jeńildetilgen tártippen ala alady. Alaıda óńirlerdegi mundaı jobalarǵa bıznes sýbektileriniń qyzyǵýshylyǵy tómen. О́ıtkeni tabysy az. Sondyqtan ákimdikterge basylymdardy satýǵa yntaly kásipkerlerge basqa da jeńildikter qarastyrý nemese kásip jasaýǵa tegin jer berý jóninde usynys joldadyq», dep atap ótti D.Qydyráli.
Jıynda sóz alǵan jýrnalıst Ertaı Aıǵalıev baspasózge jazylý máselesin, qazaq basylymdary taralymynyń azaıyp ketkenin aıta kelip, baspasózge jazylýdy halyqtan talap etý álemdik tájirıbede bar úrdis ekenin eske túsirdi. «Qazaqstanda orta eseppen 12 myńdaı kitaphana bar. Gazet-jýrnaldardy jazylý máselesin solar arqyly sheshsek, bul BAQ úshin qosymsha tynys bolar edi. Qazirgideı ekonomıkalyq ótpeli kezeńde mundaı sharalar BAQ úshin úlken múmkindik», dep atap ótti ol.
Belgili medıamenedjer Lev Tarakov mınıstrlik janynan qurylǵan BAQ týraly zań jobasyn ázirleý jónindegi jumys tobyna birinshi kúnnen bastap qatysyp kele jatqanyn aıta kelip, zańnyń jańa redaksııasy ulttyq aqparattyq keńistikti damytýdyń tıimdi quraly bolatynyna senim bildirdi.
«Ulttyq medıa keńistigimizdiń osaldyǵy, sheteldik resýrstardyń aqparattyq basymdyǵy týraly máseleni tek jýrnalıster emes, saıasatkerler, qoǵam belsendileri, túrli saladaǵy belsendi azamattar jıi kótere bastady. Bizdiń ómir súrý qundylyqtarymyz eýrostandartqa jaqyndaǵan kezde zaman da, zań da ózgeredi. Dál qazir óz mentalıtetimizden alystamaı damyǵanymyz, alǵa júrgenimiz durys. BAQ týraly zań jobasynda da osy baǵytqa basymdyq berilgeni jón», dep atap ótti L.Tarakov.
Keıinnen mınıstr Darhan Qydyráli saıt, portal jetekshileri, blogerlermen kezdesip, aqparattyq qaýipsizdik, habar taratý jyldamdyǵy men kásibı biliktilik, aqparatqa qoljetimdilik, feık aqparatpen kúres júrgizý, BAQ ókilderiniń biliktiligin arttyrý máselesi keńinen talqylanǵan dóńgelek ústel ótkizdi.
Jumys sapary sheńberinde mınıstr sondaı-aq Qazaqstan teleradıo korporasııasynyń Almatydaǵy fılıalyna baryp, joba jasaýshylar jáne qurylys kompanııasy ókilderimen júzdesti. Al «Qazteleradıo» mekemesinde ótken basqosý barysynda jýrnalıstermen sıfrlyq formatta efır taratý, jańa radıo televızııalyq stansalardy iske qosý, shekaralyq aımaqtardy radıohabar tolqyndarmen qamtamasyz etý máseleleri tóńireginde pikir almasty.
Oraıly sátte mınıstr «Kazahstanskaıa pravda» gazetiniń fototilshisi Iýrıı Bekkerge «Qurmet» ordenin tapsyryp, «Ádil sóz» sóz bostandyǵyn qorǵaý halyqaralyq qory» qoǵamdyq qorynyń prezıdenti, belgili quqyq qorǵaýshy Tamara Kaleevamen kezdesti. Jaqynda ǵana dúnıeden ótken medıamenedjer Batyr Qazybaevtyń shańyraǵyna at basyn buryp, anasy Orynsha Qarabalınamen júzdesý kezinde mınıstr: «Bıylǵy «Úrker» ulttyq syılyǵynyń bir nomınasııasyn Batyrdyń atymen ataý týraly oıymyz bar» degen jańalyǵymen bólisti.
Mınıstrdiń Almatydaǵy saparynyń ekinshi kúni etnos ókilderimen kezdesýmen jalǵasty.
ALMATY