14-15 qyrkúıekte elordadaǵy Táýelsizdik saraıynda ótetin Álemdik jáne dástúrli dinder lıderleriniń VII sezine daıyndyq kezeńi tolyǵymen aıaqtalyp, baǵdarlamasy men baıandamashylardyń quramy jasaqtaldy. Sezdiń negizgi taqyryby – «Pandemııadan keıingi kezeńde adamzattyń rýhanı jáne áleýmettik damýyndaǵy álemdik jáne dástúrli dinder lıderleriniń róli».
Sezge el Prezıdenti Qasym-Jomart Toqaev qatysady. Jańartylǵan málimetterge sáıkes is-sharaǵa álemniń 60 elinen 100-den astam delegasııa qatysady.
Sezd qatysýshylarynyń qatarynda Rım Papasy Fransısk, ál-Azhardyń Joǵarǵy ımamy sheıh Ahmad at-Taıeb, Izraıldiń Bas Ashkenazı ravvıni Davıd Laý, Izraıldiń Bas Sefarsd ravvıni Ishak Iosef, Ierýsalım pravoslavıe shirkeýiniń patrıarhy Feovıl III jáne basqa da dinı kóshbasshylar bar.
Álemdik jáne dástúrli dinder lıderleriniń VII seziniń resmı ókili Nazym Janǵazınovanyń málimdeýinshe, Sezge ıslam, hrıstıan dini (barlyq úsh baǵyt – pravoslavıe, katolısızm, protestantızm), býddızm, ıýdaızm, ındýızm, daosızm, zoroastrızm, sıntoızm rýhanı kóshbasshylary qatysady dep josparlanǵan. Sondaı-aq osy jyly sezd jumysyna alǵash ret Úndistannyń ejelgi dini – djaınızm ókilderi qatysady.
«Is-shara barysynda konfessııalardy bildiretin dinı kóshbasshylar, sonyń ishinde buryn qarym-qatynastyń kúrdeli tarıhy barlar bir ústel basyna jınalady. Osylaısha, dinı lıderler izgi nıettiń, kez kelgen aıyrmashylyqty eńserýge daıyn bolýdyń úlgisin kórsetedi. Bul – sezdiń basty mıssııasy», dedi VII sezdiń resmı ókili.
Nazym Janǵazınova aıtqandaı, BUU basshylary, sondaı-aq bedeldi halyqaralyq uıymdar basshylarynyń sez jumysyna qatysýynyń mańyzy zor. Máselen, sez delegattarynyń arasynda BUU Bas hatshysy Antonıý Gýterrısh, Islam yntymaqtastyǵy uıymynyń (IYU) Bas hatshysy Hýseın Ibrahım Taha, Islam bilim berý, ǵylymı jáne mádenı uıymynyń (ISESKO) bas dırektory Salım bın Muhammed ál-Málik, Parlamentaralyq odaq tóraǵasy Dýarte Pasheký, BUU Bas hatshysynyń О́rkenıet alıansy jónindegi Joǵarǵy ókili Mıgel Moratınos jáne t.b. bar.