Taıaýda Qarjy naryǵyn retteý jáne damytý agenttigi ekonomıkaǵa kredıt berý máseleleri boıynsha jumys keńesin ótkizdi. Keńes barysynda ekonomıkanyń naqty sektoryna kredıt berýdi keńeıtý boıynsha usynystar talqylandy.
Bul – jıi kóteriletin másele. Biraq sol másele kúıinde qala beretin. Sheshimin taýyp jatqan jaǵdaılar tym sırek. Jaqynda bul túıtkilge Memleket basshysynyń ózi kóńil aýdardy. Qasym-Jomart Toqaev nesıe resýrstarynyń tapshylyǵy otandyq bıznes úshin úlken problema bolyp otyr dep ashyǵyn aıtty.
«Qazaqstanda shaǵyn jáne orta bıznesti qarjylandyrý úshin 42 mıllıard dollarǵa jýyq qarajat jetispeıdi. Sóıte tura, bankterde trıllıondaǵan teńge qarjy is júzinde ekonomıkaǵa esh paıdasyn tıgizbeı bosqa jatyr. Ulttyq bank, Qarjy naryǵyn retteý jáne damytý agenttigi, Úkimet birlesip, naqty sektordy turaqty ári qoljetimdi nesıemen qamtamasyz etetin naqty sheshimder qabyldaýǵa tıis. Ulttyq bank qazirgi ahýaldyń óte kúrdeli ekenin eskere otyryp, barynsha ıkemdi qımyldaýy, tipti tapqyrlyq tanytýy kerek. Shetelderde buǵan qatysty oń tájirıbeler bar», dedi Prezıdent.
Agenttik tóraǵasy Mádına Ábilqasymovanyń aıtýynsha, korporatıvtik sektorǵa kredıt berýdi keńeıtý úshin birlesken júıeli sharalar qabyldaý qajet.
Keńes barysynda korporatıvtik kredıt berýdi keńeıtýdi shekteıtin kedergiler talqylandy, sondaı-aq tıisti sharalar usynyldy. Atap aıtqanda, bızneske kredıt berýdi yntalandyrý boıynsha retteýshilik sharalar, bankterdi uzaqmerzimdi qorlandyrý kózderin keńeıtý jónindegi usynystar, sondaı-aq naqty sektorǵa kredıt berýdi qoldaý baǵdarlamalaryna usynystar talqylandy.
Agenttik qaryz alýshylardyń ózara baılanysy ólshemsharttaryn ońaılatý jáne joǵary ótimdi qamtamasyz etý táýekeliniń somasynan shegeriletin tizbeni keńeıtý esebinen bir qaryz alýshyǵa táýekeldi esepteý tártibin ońtaılandyrýdy (K3 normatıvi) usyndy.
Bızneske kredıt berýdi yntalandyrý úshin 2024 jylǵa deıin shaǵyn jáne orta bıznes kredıtteri men sındıkattalǵan qaryzdardy táýekel-saralaýdyń tómendetilgen mánderin 50 paıyz deńgeıinde uzartý usynyldy. Budan basqa, kredıtterdiń qunsyzdaný ólshemsharttaryn ońtaılandyrý jáne kommersııalyq jáne turǵyn jyljymaıtyn múlik, aınalymdaǵy taýarlar, off-take kelisimsharttary jáne memleket-jekemenshik áriptestigi sharttary boıynsha aqsha túsimderi túrindegi kepilder boıynsha ótimdilik mánderin arttyrý esebinen bankterdiń kepil saıasatyna qoıylatyn talaptardy tómendetý josparlanýda.
Sonymen birge bankterdiń uzaqmerzimdi kredıttik resýrstaryn keńeıtý úshin 2024 jylǵy 1 shildege deıin ótimdilikti óteý jáne netto turaqty qorlandyrý normatıvteriniń tómendetilgen mánderiniń qoldanylýy uzartylady.
«Samuryq-Qazyna» UÁQ» AQ, «Báıterek» UBH» AQ jáne QQQ ókilderi iri jobalardy birlesip qarjylandyrý jáne sındıkattalǵan kredıt berý boıynsha usynystar usyndy. 2021 jyly sındıkattalǵan kredıt berýdi damytý úshin zańnamalyq negizder jasalǵanyn atap ótken jón. Qazirgi ýaqytta ekinshi deńgeıdegi bankter «Qazaqstannyń damý banki» AQ-pen birlesip sındıkattalǵan qarjylandyrýdyń birlesken jobalaryn iske asyrý múmkindikterin qarastyrýda», delingen agenttik habarlamasynda.
О́z kezeginde Qazaqstan qarjygerleriniń qaýymdastyǵy jer qoınaýyn paıdalaný quqyqtaryn jáne kepilge qoıylǵan jerlerdi ótkizgen kezindegi kedergilerdi atap ótken. Qaýymdastyq sarapshylarynyń sózine qaraǵanda, ondaı kedergiler kredıt berýdi keńeıtýdi shekteıdi. Budan basqa, Qazaqstan qarjygerleriniń qaýymdastyǵy orta jáne iri bıznes sýbektileriniń jobalaryna portfeldik kepildik berý tetigin keńeıtý boıynsha sharalar usyndy.