Prezıdent Qytaı Tóraǵasyna shaqyrýyn qabyl alyp, elimizge memlekettik saparmen kelgenine rızashylyǵyn bildirdi, dep habarlaıdy Egemen.kz Memleket basshysynyń baspasóz qyzmetine silteme jasap.
– Bul – pandemııadan keıin sizdiń shetelge alǵashqy saparyńyz. Sondyqtan osy saparyńyzdyń tarıhı maǵynaǵa ıe. Men muny joǵary deńgeıdegi ózara senim men yntymaqtastyqtyń kórinisi dep baǵalaımyn. Bıylǵy 5 aqpanda XXIV Qysqy Olımpıada oıyndarynyń ashylý saltanatyna qatysqanymdy bilesiz. Sol kezde Beıjińde ótken kezdesýimizdi yqylaspen eske alamyn, – dedi Memleket basshysy.
Kezdesýde Qasym-Jomart Toqaev Qazaqstan men Qytaı arasynda dıplomatııalyq qatynas ornaǵanyna 30 jyl tolǵanyn atap ótti.
– Sizdiń saparyńyz osy mereıli beleske tuspa-tus kelip otyr. Qysqa merzim ishinde biz turaqty memleketaralyq qatynas ornattyq. Siz Qazaqstan ekonomıkasyn damytýǵa jáne bizdiń halyqaralyq bastamalarymyzǵa udaıy qoldaý kórsetip kelesiz. Sol úshin ózińizge zor alǵys aıtamyn, – dedi Prezıdent.
Qasym-Jomart Toqaevtyń aıtýynsha, 2019 jylǵy qyrkúıektegi Beıjińge memlekettik sapary kezinde qol jetkizilgen jan-jaqty máńgilik strategııalyq seriktestik jónindegi ýaǵdalastyq sátti júzege asyrylyp jatyr. Búgingi birlesken málimdeme qarym-qatynastardyń jańa «altyn 30 jyldyǵynyń» bastalǵanyn bildiredi. Sondyqtan Qytaı Tóraǵasynyń bul sapary asa mańyzdy.
QHR Tóraǵasy araǵa jyl salyp Qazaqstanǵa qaıta kelgenine qýanyshty ekenin aıtyp, qazaq halqynyń qonaqjaılyǵy men memlekettik saparmen kelýge shaqyrǵany úshin Prezıdentke rızashylyǵyn bildirdi. Sı Szınpın qazaq-qytaı qarym-qatynastarynyń damýyn joǵary baǵalap, búgingi saparynyń ekijaqty baılanystardy odan ári ilgeriletýge tyń serpin beretinin atap ótti. Onyń aıtýynsha, Qytaı óńirlik jáne halyqaralyq kún tártibindegi máselelerge qatysty Qazaqstannyń ustanymdaryn qoldaıdy.
– Qazaqstan halqy sizdiń basshylyǵyńyzben memlekettik qurylys pen ulttyq jańǵyrý isinde jańa tabystarǵa jetetini kúmánsiz. Qytaı úkimeti Qazaqstanmen aradaǵy qarym-qatynastarǵa zor kóńil bóletinine taǵy da qaıtalap aıtqym keledi. Halyqaralyq jaǵdaı qalaı ózgerse de, biz aldaǵy ýaqytta Qazaqstannyń táýelsizdigin, egemendigin jáne terrıtorııalyq tutastyǵyn saqtaýyna qoldaý kórsetemiz. Turaqtylyq pen damýdy qamtamasyz etý jónindegi Siz júrgizip jatqan reformalardy tolyq qoldaı otyryp, sizdiń elińizdiń ishki isterine qandaı da bir kúshterdiń aralasýyna úzildi-kesildi qarsy bolamyz. Qazaqstannyń senimdi dosy jáne senimdi seriktesi boldy jáne bolyp qala beredi. Dıplomatııalyq qarym-qatynastar ornaǵaly beri Qazaqstan men Qytaı arasyndaǵy beriktik synynan laıyqty ótken qarym-qatynastar únemi jańa mazmunmen tolyǵyp, damýmen, jemisin berip keledi. Bizdiń elderimiz birqatar salalardaǵy yntymaqtastyqtyń avangardyna aınaldy. Shekara máselelerin alǵashqylardyń biri bolyp sheshtik. «Bir beldeý, bir jol» baǵdarlamasy aıasyndaǵy yntymaqtastyq úlgisin kórsetip, ındýstrııalandyrý salasyndaǵy halyqaralyq yntymaqtastyqty alǵashqylardyń biri bolyp damyttyq. Biz ekijaqty qarym-qatynastardy serpindi damýǵa qol jetkizip, Qytaı dıplomatııasynda teńdesi joq máńgilik jan-jaqty strategııalyq áriptestik deńgeıine shyǵardyq. Búginde Qazaqstan-Qytaı qarym-qatynasy jańa tarıhı bastaý aldy, – dedi Sı Szınpın.
Taraptar kólik-logıstıka, azyq-túlik ónerkásibi, aýylsharýashylyq salalarynyń máseleleri jáne transshekaralyq ózender jaıyn talqylady.
Kelissózderden keıin eki memlekettiń basshylary Qazaqstan Respýblıkasy men Qytaı Halyq Respýblıkasy arasyndaǵy dıplomatııalyq qatynastardyń ornatylǵanyna 30 jyl tolýyna oraı birlesken málimdemege qol qoıyldy.