Shotlandııanyń Glazgo qalasynda shymyldyǵy túrilgen Devıs kýbogi jolyndaǵy jarystyń tusaýkeser kezdesýinde D tobyndaǵy Qazaqstannyń tennısshileri Nıderland quramasynan 1:2 esebimen utyldy.
Alǵashqy bolyp kortqa Mıhaıl Kýkýshkın shyqty. Álemdik reıtıngte 214-orynda turǵan jerlesimiz Tallon Grıkspýrmen kúsh synasty. Ardager sportshymyzdyń ATR tiziminde 46-satyǵa jaıǵasqan 26 jastaǵy Nıderlandtyń ókiline áli jetpedi – 1:6, 6:3, 3:6. Odan keıin Aleksandr Býblıktiń ónerin tamashaladyq. Úzdikter reıtınginde 44-oryndy enshilegen otandasymyz Botık van de Zandshýlppen saıysqa tústi. Myqtylardyń tiziminde ol Býblıkten toǵyz saty joǵary ornalasqan. Alǵashqy sette bizdiń oıynshy jeńiske jetkenimen, qalǵan ekeýi van de Zandshýlptiń paıdasyna sheshildi – 6:3, 1:6, 4:6. Juptyq básekede qos Aleksandr – Býblık pen Nedovesov Veslı Kolhov pen Matve Mıddelkopty qapy qaldyrdy – 6:4, 1:6, 6:3. Qorytyndy esep – 1:2.
A tobyndaǵy Shvesııa Argentınadan 2:1 esebimen aılasyn asyrdy. V tobyndaǵy Kanada Ońtústik Koreıany utty – 2:1. S tobyndaǵy Aýstralııa Belgııaǵa bet qaratpady – 3:0. Qazaqstannyń tennısshileri búgin Devıs kýboginiń 32 dúrkin jeńimpazy degen ataǵy bar AQSh quramasymen kezdesedi. Bul komandanyń sapynda Teılor Frıs, Tommı Pol, Djek Sok jáne Radjıv Ram syndy sańlaqtar óner kórsetýde. Al 18 qyrkúıek kúni Ulybrıtanııamen kúsh synasamyz.