ASTANA. 15 mamyr. 2014 jyldyń 6 shildesinde ashylǵaly otyrǵan, jalpy aýmaǵy 74 myń sharshy metrdi quraıtyn Ulttyq murajaıǵa ótkenimiz ben búginimizden syr shertetin qundy jádigerler ákeline bastady. Bul týraly «QazAqparat» habarlady.
Bul jádigerlerdiń qataryna qazaq handarynyń tý basy men Tóle bıdiń shapany qosyldy.
Shekpendi Tóle bıdiń Qojamjarynan taraǵan urpaqtar kózderiniń qarashyǵyndaı saqtap kelipti. Murajaıǵa ákelingen shapan qaıta jasaqtalǵan kóshirme eken.
Ulttyq murajaıynyń dırektory Darhan Myńbaı: «Murajaıǵa Almaty oblysynan biregeı qazaqtyń kıiz úıi, Jambyl oblysy Jalǵyz oba qorǵanynan altyn buıymdar jáne Pavlodar, Soltústik Qazaqstan, Aqtóbe oblystarynan qundy jádigerler, Andronov dáýirinen jetken tarıhı qundylyqtar túsip jatyr. Bul jádigerler bizdiń murajaıymyzdan oıyp turyp oryn alady. Murajaıǵa qoıylǵan tarıhı qundylyqtar Qazaqstannyń ótkenin pash etetin birden-bir jádigerlerdiń qataryna qosyldy deýge bolady», – dedi.
Al qazaq handarynyń tý basyn alyp kelgen han Táýkeniń tikeleı urpaǵy Bekaıdar Ámire: «Bul tek qana bir sandyqta jatpasyn, eldiń kóz qýanyshy bolsyn dep, keshegi bizdiń el, úlken bir memleket bolǵanymyzdy, onyń týy bolǵanyn bildirý maqsatynda osy qundy dúnıeni Astanaǵa ákelip otyrmyz. Men Áz Táýke hannyń toǵyzynshy urpaǵymyn. Atadan balaǵa mura bolyp kelgen qara shańyraqta osy tý saqtalyp keldi. Hannyń urpaǵy bolǵandyqtan, osy týdyń basy meniń otbasymda qalǵan. Biz bul týdy eń birinshi qundy zat retinde tórimizde atalar amanaty retinde kóziń qarashyǵyndaı saqtap keldik. Onyń resmı ataýy «Handar týy» ekeni belgili, keıbireýler ony Joshy hannyń tusynan keledi deıdi, endi biri ony Táýke hannan kele jatqan tý desedi», – dedi.
Tý basy metalldan jasalǵan, túsi - qoıý qońyr, keıbir qyrlarynda sarǵysh bolyp keledi. Onyń jalpy bıiktigi - 21,5 sm., ústińgi bóligi kúmbez tárizdi.
Joldybaı Bazar.
Derekkóz: «QazAqparat».
Foto: «QazAqparat».