ASTANA. 15 mamyr. Máskeýde Eýrazııalyq ekonomıkalyq odaq qurý týraly kelisim jobasyn daıyndaýǵa baılanysty keńes ótti. Oǵan Úkimet basshysynyń birinshi orynbasary Baqytjan Saǵyntaev qatysty. Bul týraly primeminister.kz habarlady.
Eýrazııalyq ekonomıkalyq komıssııa keńesi otyrysynda belgili bolǵandaı, basty qujat – kelisim jobasy jan-jaqty talqylanyp, taraptar ortaq mámilege keldi. Endi ishki memlekettik prosedýralardy júrgizý kerek. Sondaı-aq, qujat mátini memlekettik tilge aýdarylady.
Esterińizge sala keteıik, Astanada aldaǵy 29 mamyrda Qazaqstan, Reseı, Belarýs elderiniń basshylary Eýrazııalyq ekonomıkalyq odaq qurý týraly kelisimge qol qoıady.
Atalǵan kelisim-shart úsh eldiń ekonomıkasyna, ıaǵnı, kólik, energetıka, agroónerkásip salalarynyń teń quqyqty damýyna, shynaıy básekelestikti óristetýge zor yqpalyn tıgizedi dep kútilýde.
B.Saǵyntaev: «Bizdiń birlesken jumysymyz «úshtiktiń» arasyndaǵy ıntegrasııanyń joǵarǵy deńgeıde ekeniniń kórinisi, teń quqyqty áriptestik qatynas áleýetin tıimdi paıdalanýǵa nıetti ekenimizdi atap ótýge tıispin», – dedi.
Joldybaı Bazar.
Derekkóz: primeminister.kz.
Foto: remarka.kz.