ASTANA. 15 mamyr. Rejısser Ádilhan Erjanovtyń «Úkili kámshat» fılmi Kann kınofestıvaline qatysady. Bul týraly Today.kz habarlady.
Ádilhan Erjanovtyń aıtýynsha, «Úkili kámshat» 2013 jyldyń jazynda Almaty oblysynda túsirilgen.
Rejısser: «Kann kınofestıvaline úmitkerlerdiń esimi 17 sáýirde anyqtalǵan. Biraq, aı sońynda dodadan tys fılmderdiń tizimi de belgili boldy. Sonyń ishinde men túsirgen týyndynyń bolǵany qýantady», – dedi.
Janr boıynsha, bul fılm dramaǵa jatqyzylady. Biraq kıno synshylary oǵan «qara komedııa» dep aıdar taǵypty.
Osymen 67-ret uıymdastyrylyp otyrǵan kınofestıval búginnen bastap 25 mamyrǵa deıin jalǵasady. Baıqaýda 18 fılm baq synaıdy. Kınoforýmnyń shymyldyǵy «Monakolyq Greıs» týyndysymen túrilmek.
Taǵy bir qýanarlyq jáıt, taǵy bir otandasymyz Marǵulan Qapashevtiń «Erkin qustar» qysqametrajdy fılmi Short Film Corner baǵdarlamasy aıasynda kórsetiledi dep kútilýde.
Kann kınofestıvaline buǵan deıin qazaqstandyq eki kınorejısserdiń týyndysy qatystyrylǵan. Olardyń biri – D.О́mirbaevtyń «Kıller» fılmi (1998 j.) bolsa, ekinshisi – N.Túrebaevtyń qysqa metrajdy «Antıromantıka» atty (2001j.) týyndysy. Bul ekeýiniń ishinde «Kıller» «erekshe kózqaras» júldesin ıelengen.
Joldybaı Bazar.
Derekkóz: Today.kz.
Foto: ssoyachts.com.