ASTANA. 16 mamyr. Memleket basshysyna Ońtústik Qazaqstan oblysynda atqarylyp jatqan ıgi ister tanystyryldy. Bul týraly akorda.kz habarlady.
Sapar barysynda Saryaǵash aýdanyndaǵy «Bıo Semena» JShS-na barǵan Nursultan Nazarbaevqa óńirdegi aýyl sharýashylyǵynyń ahýaly men ony damytý perspektıvalary jóninde aqparat berildi. Sondaı-aq, Prezıdent kókónister tuqymyn jáne kósheni bezendirýge arnalǵan aǵash kóshetterin ósirý isin kórdi. Sondaı-aq, ol aýyl sharýashylyǵy taýarlaryn óndirýshilermen jáne Saryaǵash aýdanynyń jurtshylyǵy ókilderimen áńgimelesti.
«Bıo Semena» JShS baǵy egistiginiń jalpy kólemi 60 gektar, onyń 27 gektaryn kóshe bezendirýge arnalǵan aǵashtar alyp jatyr, 33 gektary tuqymdyq egistikke tıesili. Búginge deıin kásiporyn 250 jumys ornyn ashqan.
Budan keıin ol Shymkent qalasyndaǵy «Bal Tekstıl» JShS-nyń kilem jáne kilem buıymdaryn shyǵaratyn fabrıkasyna keldi.
Bul jerde Memleket basshysyna «Ońtústik» arnaıy ekonomıkalyq aımaǵy aýmaǵyndaǵy jobalardyń júzege asyrylý barysy jáne atalǵan fabrıkanyń toqyma jáne tigin jelisi tehnologııalyq prosesi baıandaldy.
«Bal Tekstıl» JShS – óńirdegi kilem jáne kilem buıymdaryn shyǵaratyn alǵashqy fabrıka. Jobany júzege asyrý barysynda 700 jumys ornyn ashý kózdelip otyr.
Nursultan Nazarbaevqa mundaǵy tehnıkalyq jabdyqtar jaıly maqtanyshpen aıtyldy. Belgııalyq kompanııa shyǵarǵan qurylǵylar elimizdiń basqa esh jerinde joq kórinedi.
Sonymen qatar, Nursultan Nazarbaev Shymkenttegi №3 emhana ujymymen kezdesti. Emhanada Prezıdentke oblystaǵy densaýlyq saqtaý salasynyń negizgi kórsetkishteri, sonyń ishinde jańa tehnologııalardy engizý úderisi habarlandy. Bir aýysymda 500 adamdy qabyldaı alatyn №3 emhana «100 mektep, 100 aýrýhana» jobasy aıasynda salynǵan. Ol dıagnostıkanyń sáýlelik, fýnksıonaldyq, endoskopııalyq, bıohımııalyq jáne ımmýnologııalyq túrlerin qamtıtyn jańa dıagnostıkalyq qurylǵymen jabdyqtalǵan.
Memleket basshysy: «Oblystyń áleýmettik nysandaryn damytýǵa kóp qarajat bólinýde. Memlekettiń densaýlyq saqtaý salasyna úlken qamqorlyǵy arqasynda Ońtústik Qazaqstan halqynyń ómir jasy 3 jylǵa uzaryp, 71 jasqa jetti. Bul - eń basty jetistik. Ana men bala ólimi kúrt azaıdy», - dedi.
Sapar barysynda Shymkenttegi «Kórme ortalyǵyna» barǵan Prezıdent Ońtústik Qazaqstan oblysynyń kásipkerlerimen kezdesti. Kórme ortalyǵynda ol Shymkent qalasynyń jańa ákimshilik ortalyǵy qurylysy jobasymen jáne Ońtústik Qazaqstan oblysyndaǵy kásiporyndar taýarlarynyń óńirlik kórmesine qoıylǵan ónimdermen tanysty.
Nursultan Nazarbaev: «Qalada da, oblysta da kóp jumys istelip jatyr. О́ńirdegi taýar ónimdiliginiń qarqyny óte jaqsy. Ol 3 jyl ishinde eki ese ósti. Oblysta aýyl sharýashylyǵyn damytý úshin aıtarlyqtaı áleýet jáne qolaıly klımattyq jaǵdaı bar», – dedi.
Buǵan qosa, Prezıdenti oblys aýmaǵy arqyly ótetin «Batys Qytaı - Batys Eýropa» avtokólik joly, temirjol jáne qubyr magıstralderin qamtıtyn damyǵan kólik júıesi bızneske qosymsha jaǵdaılar týdyratynyn atap ótti.
Sonymen qatar, Memleket basshysy óńirdegi birqatar problemalarǵa, atap aıtqanda, keıbir jańa óndiristerdiń toqtap qalýy men mektepterdegi oryn jetispeýshiligi máselelerine de toqtaldy.
Kezdesý kezinde Ońtústik Qazaqstan oblysynyń ákimi Asqar Myrzahmetov óńirdiń áleýmettik-ekonomıkalyq damýy týraly baıandama jasady.
Joldybaı Bazar.
Derekkóz: akorda.kz.
Foto: Facebook.com.