Qazaqstannyń Belgııadaǵy elshiligi «Eýropalyq muralar kúni» aıasynda eki kún boıy Brıýssel turǵyndary men qonaqtaryn qazaq mádenıetimen jaqynyraq tanystyrdy, dep habarlaıdy Egemen.kz SIM baspasóz qyzmetine silteme jasap.
Dıplomatııalyq ókildiktiń ǵımaratyna kelýshiler kireberistegi qazaqstandyq fotograftar túsirgen týyndylarmen tanysa alady. Eýropalyq odaq astanasynyń júzdegen turǵyndary men qonaqtary qazaq kıiz úıiniń jabdyqtarymen jáne elimizdiń baı mádenıeti men alýan túrli tabıǵatyn beıneleıtin kórmemen jaqynyraq tanysyp, dombyra únin tyńdap, qazaqtyń ulttyq kıimderin kıip, estelik sýretke tústi.
Elshilik qonaqtary, onyń ishinde belgııalyq saıasatkerler, kásipkerler, dıplomattar, elimizdiń mýzykalyq ónerimen, eldiń týrıstik áleýeti, qazaqstandyq seriktestermen iskerlik baılanystardy ornatý jáne nyǵaıtý múmkindikteri týraly suraqtar qoıdy. Keıbireýleri Álemdik jáne dástúrli dinder lıderleriniń VII sezine qatysý úshin Rım Papasy Fransısktiń jaqynda Astanaǵa jasaǵan memlekettik sapary arqyly Qazaqstanǵa qyzyǵýshylyq tanytqanyn aıtty.
Jyl saıyn qyrkúıektiń ortasynda atap ótiletin «Eýropalyq muralar kúnderine» alǵash ret qatysqan Qazaqstannyń Brıýsseldegi elshiligi Belgııa men Eýroodaqtyń astanasynda elimizdiń baı mádenıetin, týrıstik jáne ınvestısııalyq áleýetin tanystyrý maqsatyndaǵy belsendi jumysyn áli de jalǵastyrmaq.