Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın Prezıdenttiń AQSh-taǵy kezdesýleri jaıly jazba jarııalady, dep habarlaıdy Egemen.kz.
«Muhıt asyp, AQSh-qa is saparmen keldik. Búgin Memleket basshysy Qasym-Jomart Kemeluly qazaq jastarynyń basyn qosqan Digital Nomads qaýymdastyǵynyń múshelerimen kezdesti. Qaýymdastyq - álemniń túkpir-túkpirinde alpaýyt tehnologııalyq kompanııalarda jumys istep júrgen qazaqstandyq IT-mamandardyń basyn biriktirip otyr. Atap óterligi, Digital Nomads bizdiń mınıstrliktiń bastamasy boıynsha qurylǵan bolatyn. Búginde onyń quramynda 400-den astam IT-maman bar», dep jazdy Baǵdat Mýsın feısbýktegi paraqshasynda.
Kezdesýge jer jahannan 30-dan astam IT-maman kelgen. Olar saladaǵy ózekti máselelerdi talqylaǵan.
«Atap aıtqanda, olardyń qazaqstandyq mamandardyń jańa býynyn daıyndaýǵa kómektesýi, sporttyq baǵdarlamalaý jáne venchýrlyq ınvestısııalar boıynsha jobalardy iske asyryp jatqany týraly aıtyldy. Budan bólek, Digital Nomads ókilderi sheteldik IT-materıaldardy qazaq tiline aýdarýǵa baǵyttalǵan jobalardy júzege asyrýda. Osylaısha olar elimizden jyraqta bolsa da, myńdaǵan shaqyrym jerde turyp, Qazaqstannyń turaqty damýyna úlesterin qosýda. «Uıymdasqan utady» degen qanatty sóz bar! Bir tabysty mysalǵa toqtala keteıin. Bir kezderi AQSh pen Eýropanyń joǵarǵy oqý oryndarynda bilim alǵan Úndi eliniń azamattary, qazaq jastary sııaqty ózderiniń IT-mamandarynyń qaýymdastyǵyn qurǵan bolatyn. Ýaqyt óte kele osy toptan shyqqan Úndi jastary álemdegi tanymal IT-kompanııalarda basshylyq laýazymdardy ıelendi. Qazirgi ýaqytta olar óz otandastarynyń startaptaryn qoldaı otyryp, ózderiniń eline qomaqty ınvestısııa tartýda. Men qazaq jastary da otandyq IT-salany qoldaı otyryp, týǵan elimizdiń damýyna qol ushyn sozǵanyn qalaımyn», dedi mınıstr.