Memleket basshysy Qasym-Jomart Toqaev jýyrda qoǵam aldyna saılaý aldyndaǵy tuǵyrnamasyn usynatynyn málimdedi. Bul týraly Prezıdent búgin qazaqstandyqtarǵa joldaǵan úndeýinde aıtty, dep habarlaıdy Egemen.kz.
«Men Joldaýymda saılaý merzimin jarııa túrde jáne ashyq aıttym. Osylaısha, biz basty memlekettik ınstıtýttar – Prezıdent, Parlament, Úkimet jáne máslıhattardyń bárin birtindep qaıta quramyz. Osy bastamalar jarııalanǵannan beri bir aıǵa jýyq ýaqyt ótti. Bul – barlyq máseleni baıyppen talqylap, jaǵdaıdy baǵamdaýǵa jetkilikti merzim. Halyq bizdiń saıası júıeni ózgertý týraly josparymyzdyń mán-mańyzyn jaqsy túsinip otyr», delingen el Prezıdentiniń úndeýinde.
Memleket basshysy bıylǵy Joldaýda kórsetilgen áleýmettik-ekonomıkalyq sharalardy jýyrda halyqqa usynatyn saılaý aldyndaǵy tuǵyrnamasyna qosatynyn atap ótti.
«Men Joldaýymda aýqymdy áleýmettik-ekonomıkalyq sharalar qolǵa alynatynyn jarııaladym. Biz onyń bárin jaqyn arada júzege asyrýymyz kerek. Kóp uzamaı qoǵamǵa saılaý aldyndaǵy tuǵyrnamamdy usynamyn. Onda áleýmettik-ekonomıkalyq damýdy kózdeıtin jańa bastamalar aıtylady», dep qosty Qasym-Jomart Toqaev.