QR Indýstrııa jáne ınfraqurylymdyq damý mınıstrligine qarasty Azamattyq avıasııa komıteti Máskeýden Almatyǵa baǵyttalǵan avıabıletterdiń tarıfteri ózgermegenin atap ótti, dep habarlaıdy Egemen.kz.
Komıtet áleýmettik jelide taraǵan aqparatta Máskeýden Almatyǵa avıabıletterdiń quny Dýbaı arqyly tranzıttik reısti eskere otyryp kórsetilgenin naqtylady.
«Baǵasy 7,8 mln teńgelik bılet Máskeý – Dýbaı (Emirates) jáne Dýbaı - Almaty («Eır Astana») baǵyty boıynsha tranzıtten qalyptasqan», delingen habarlamada.
Komıtettiń habarlaýynsha,ı Máskeý – Almaty jáne Dýbaı – Almaty baǵyttary boıynsha qazaqstandyq avıakompanııalardyń tikeleı reısterinde tarıfter ózgergen joq.
2022 jylǵy 24 qyrkúıektegi Máskeý (Vnýkovo) – Almaty baǵyty boıynsha SCAT reısine bılet quny 253 688 teńgeni jáne 29 qyrkúıektegi – 208 078 teńgeni quraıdy;
2022 jylǵy 22 qyrkúıektegi Dýbaı – Almaty baǵyty boıynsha «Eır Astana» reısine bılet quny 334 146 teńgeni quraıdy.
Eske sala ketsek, búgin 21 qyrkúıekte Reseı prezıdenti Vladımır Pýtın elde ishinara jumyldyrý sharalaryn jarııalady.
Reseılik advokat Georgıı Melkov Federal Press agenttigine Reseı zańdaryna sáıkes 18 jastan 65 jasqa deıingi barlyq er adamdar shetelge shyǵa almaıtynyn aıtty.
Alaıda Reseıde jumyldyrý sharalary qalaı uıymdastyrylatyny áli belgisiz.