О́tken jyldarda egemendi memleket qurý úderisi barysynda elimizde qatelikterdiń oryn alǵany aqıqat. Sonyń kesirinen týyndaǵan máseleler sózbuıdalyqqa salynyp jyldar boıy óz sheshimin tappaýy azamattardyń áleýmettik jaýapkershiligin tómendetti.
Batys elderi men halyqaralyq uıymdar Qazaqstannyń saıası júıesindegi demokratııanyń joqtyǵy týraly másele kóterip, shekten tys ortalyqtandyrylǵan bıliktiń bir adamnyń qolyna shoǵyrlanýy memlekettik organdar jumysynyń tıimdiligin nasharlatyp, jemqorlyq kúsheıýde dep, azamattardy bılikke qarsy qoıyp, úkimettik emes uıymdar qurýǵa arnaıy qarjy bólip, «mamandaryn» jiberip, batystyq «qundylyqtaryn» tabandylyqpen tańyp, azamattarymyzdyń demokratııalyq «saýatyn ashýǵa» tyrysyp baǵýda.
Sondyqtan búgin Ádiletti Qazaqstandy qurý úshin qoǵamdyq kelisimdi nyǵaıtý, qoǵamdyq jáne saıası ınstıtýttardy, azamattyq qoǵamdy damytý qajet. Azamattardyń áleýmettik belsendiligin arttyrýdyń mańyzyn eskere otyryp, Memleket basshysy Q.Toqaev memleket pen qoǵam arasyndaǵy seriktestikti kúsheıtý men osy ortaq iske beıjaı qaramaıtyn azamattardy tartý máselesine erekshe mán berip, olardyń Ádiletti Qazaqstandy qurýdaǵy sheshýshi rólimen qatar bul áleýmettik kúshtiń orasan zor áleýetine de úlken mán berip otyr. Sondyqtan Ádiletti Qazaqstandy qurýdyń ulttyq ıdeıasy retinde áleýmettik toptastyrý algorıtmderin ázirleýge erekshe kóńil bólýinde tereń oı jatyr. El birligin nyǵaıtyp, qoǵamdy biriktiretin tyń ıdeıalardyń ordasyna aınalyp, azamattyq dıalog pen baqylaý osy júıeniń bir bóligi ǵana emes, ótkennen búginge jáne bolashaqqa baǵyttalǵan ulttyq ıdeologııanyń mańyzdy elementine aınalatyn bolady. Sonda ǵana qaıta qurýlar birte-birte jalpyhalyqtyq sıpat alyp, elimizdiń árbir azamatyna túsinikti bolyp, bir mezgilde saıası jaýapkershilik mádenıetin damytyp, qoǵamda shynaıy patrıottyq sezimniń qalyptasýyna ákelmek. Buǵan Qazaqstannyń belsendi azamattyq qoǵam men azamattyq ustanymǵa múddeliligi óz yqpalyn tıgizbek. Nátıjesinde, ulttyq biregeılik nyǵaıyp, áleýmettik qundylyqtar jańaryp, qoǵamdaǵy ózara árekettesý mádenıeti ózgerip, tarıhı ádilettiliktiń ornyǵary anyq. Ol úshin zań saltanat quryp, qoǵamnyń quqyqtyq saýattylyǵy artyp, sana jańǵyryp, dıalog mádenıeti ómirge kelýi qajet. Sonda ǵana memleket pen qoǵam arasyndaǵy seriktestik nyǵaıyp, adal eńbek pen ádilettilikke qol jetkizýge bolady. Bul túbinde qazaqstandyq biregeıliktiń jańa, jalpyazamattyq jáne saıası alǵysharttaryn qalyptastyrar edi.
Bul máselede synı turǵydan qarastyrýdy qajet etetin keıbir problemalyq tustar da bar. Bul, eń aldymen, qazaqstandyq ÚEU-nyń qyzmeti men ustanymdaryna degen syrtqy áserdiń kúsheıýi jáne halyqaralyq uıymdardyń qysym kórsetý múmkindigine qatysty bolyp otyr. Sebebi búgingi memleketaralyq qatynastardyń shıelenisýi jaǵdaıynda halyqaralyq úkimettik emes uıymdarmen ózara árekettesý máselesi de kúrdelenip ketýi yqtımal. О́ıtkeni olar bizdi HH ǵasyrdyń 90-shy jyldarynan beri «jetelep», ekonomıkany bylaı qoıǵanda, osy saladaǵy kóptegen zańdar EQYU, AQK, EO sııaqty adam quqyǵyn qorǵaýǵa qatysy bar halyqaralyq uıymdardyń talap etýimen barabar «usynymdary» boıynsha qabyldanǵany da jasyryn emes. Onyń ústine qazir jahandyq lıberaldyq demokratııa óziniń dármensizdigin kórsetip otyrǵandyqtan bul másele álemde burynǵydan beter ótkir jáne balamasyz sıpatqa ıe bolyp barady. Osy turǵyda, úkimettik emes halyqaralyq uıymdar men AQSh bastaǵan ujymdyq Batys elderi ustanymdarynyń bulyńǵyrlyǵy men qyzmetteriniń shekten tys saıasılandyrylýyna baılanysty jáne halyqaralyq qatynastardyń buryn-sońdy bolyp kórmegen deńgeıde shıelenisýi, kórshilerimizdiń sanksııalyq soǵysqa tartylýy jaǵdaıynda Qazaqstanǵa erte me, kesh pe, osy jáne basqa da kúrdeli máselelermen betpe-bet kelýine týra keleri anyq. Qalaı bolǵanda da, osynyń barlyǵyn eskerip, árbir isimizde táýelsizdik, ulttyq múdde men mádenıet, adamgershilik pen dástúrli qundylyqtyq muralar basymdyqqa ıe bolýy kerek.
Qazir qazaqstandyq ÚEU qyzmetiniń kásibıligi men derbestigin arttyryp, ony tar vedomstvolyq sheńberden shyǵaryp, eldiń strategııalyq damý múddesi men patrıottyq ustanymynyń áleýetin kóterý máselesinde qańtar tragedııasynyń sabaqtaryn eskergen jón. Sonda ǵana Qazaqstan azamattarynyń óz bolashaǵyna, bılikke degen senimi artyp, azamattyq qoǵam men memlekettik organdardyń arasyndaǵy qarym-qatynas deńgeıi kóteriletini sózsiz.