Aqmola oblysyndaǵy HQKO-da óńirge kelgen Reseı azamattaryna qyzmet kórsetý úshin qosymsha terezeler ashyldy. Máselen, Kókshetaý qalasynyń halyqqa qyzmet kórsetý ortalyǵynda qosymsha úsh tereze men elektrondy kezek paıda boldy, dep habarlaıdy Egemen.kz.
Aqmola oblysy ákiminiń orynbasary Malǵajdar Tátkeevtiń aıtýynsha, 26 qyrkúıektegi jaǵdaı boıynsha Reseı Federasııasynda ishinara jumyldyrý jarııalanǵannan beri Aqmola oblysyna 1436, ótken táýlik boıynsha 601 reseılik kelgen.
«Onyń ishinde ishki ister organdaryna 351 adam, vıza jáne kóshi-qon portaly arqyly 264 adam, «E-konak» mobıldi qosymshasy arqyly 821 adam baılanysqa shyqqan. Qazaqstan Respýblıkasynda ýaqytsha turýǵa 257 adam ruqsat alǵan. Al, ótken táýlik boıynsha 31 adamǵa ruqsat berildi», dep bólisti spıker.
Oblysta barlyǵy 4499 Reseı Federasııasynyń azamaty, onyń ishinde 269 kámeletke tolmaǵan balalar turaqty tirkeýde tur. Aǵymdaǵy jyldyń basynan beri 343 Reseı Federasııasynyń azamattaryna turaqty turýǵa ruqsat berildi. Qazaqstan Respýblıkasynyń azamattyǵyn alý úshin 57 reseıliktiń ótinishi qabyldandy, onyń ishinde 10 qandasymyz bar.
«Búginde HQKO-da JSN daıyndaý boıynsha kórshiles memleketterden shetel azamattarynyń aǵylýy baıqalady. Máselen, 26 qyrkúıekte oblystaǵy HQKO-ǵa 508 shetel azamaty JSN alý úshin ótinish bergen. О́tken aptada barlyǵy 421 úmitker ótinish bildirgen», deıdi Aqmola oblysy boıynsha «Azamattarǵa arnalǵan úkimet» memlekettik korporasııasy» KEAQ fılıalynyń orynbasary Jasqaırat Eslıambekov.
Eń kóp ótinishter Kókshetaý qalasynda (287), Býrabaı aýdanynda (73), Qosshy qalasynda (49) tirkelgen.