Qaraǵandylyq sýretshi Káripbek Kúıikovtiń týyndylaryna has ónerdi asa áspetteıtin fransýzdar da kýá bolysty. 8 kúnde Fransııanyń túrli qalalaryndaǵy kórmede fransýzdar Káripbektiń taǵdyry men týyndysy arqyly jalpy ıadrolyq qarýdyń qandaı zulmat ekenine jáne bir kóz jetkizdi.
Kórmeni uıymdastyrýǵa muryndyq bolǵandar qatarynda – Álem qozǵalysy (Mouvementdelapaix), Rena-Almaty baýyrlastyq komıteti, Qazaqstannyń Fransııadaǵy elshiligi jáne Strasbýrgtegi Qazaqstannyń Bas konsýldyǵy bar. Sýretshiniń saparyna qarjy-qarajat áleýmettik jeli arqyly jınalsa, Qaraǵandy oblysy ákimi Jeńis Qasymbek, Amanat partııasynyń fılıaly zor qoldaý kórsetkenin ataǵan jón.
Eýropa keńesinde (Strasbýrgte), Strasbýrg ýnıversıtetinde, Qazaqstannyń Fransııadaǵy elshiliginde (Parıj), Senatta (Lıýksembýrg saraıy, Parıj), assosıasııa úıinde (Renn) ótken kórmeler kóptiń kóńilinen shyǵyp, kókiregine qonaqtap jatqanyn fransýzdar da jasyrmady.
Kórmeni uıymdastyrýshynyń biri, álemge tanymal qoǵamdyq uıym – Álem qozǵalysynyń ulttyq hatshysy Rolan Nıve Káripbekke kartınalaryn satýda kómek qolyn sozatynyn atap ótý kerek.
Torsı qalasy meriniń orynbasary Brıs Masseks Káripbektiń ómir tarıhynyń jan tebirenterligin aıtady.
– Men onyń ómirbaıanyna, osyndaı jaǵdaıǵa qalaı jet- kenine qaıran qalamyn. Búginde mynadaı aqparattardy bilýge tıispiz. Káripbek arqyly kóp jaıttan habardar boldym, –deıdi Brıs Masseks.
Taǵdyry kúrdeli sýretshi fransýzdyqtar nazaryna 17 eńbegin usyndy. Onyń týyndysynyń basym bóligi antııadrolyq taqyryppen birge Qazaqstannyń peızajyna arnalǵan. Sýretshiniń SMA dertinen zardap shegetin, «Zolgensma» ekpesine asa muqtaj kishkentaı qaraǵandylyq Aıkúmis Sársendi qoldaýǵa arnalǵan týyndysyn Qazaqstannyń Fransııadaǵy elshiligi satyp aldy. Túsken qarajat balanyń ata-anasyna berilmek.
Sýretshi ózine bul kórmeniń zor mártebe ekenin aıtady. Jańa kitaptyń paraǵy ashylǵandaı áserde ekenin jetkizdi.
– Fransııada buryn-sońdy bolmaǵan edim. Fransýzdardyń eńbekterimdi tamashalaýy keýdeme maqtanysh sezimin uıalatty. Árıne, osy arada Qazaqstanymyzdyń tarıhy, Semeı polıgonynyń tarıhy týraly aıtýǵa bolady. Parıjde Senatta ıadrolyq qarýmen kúresýge úles qosqandar jınaldy. Meniń osynda kelýime yqpal etken, kómekteskenniń bárine alǵysym sheksiz, – deıdi K.Kúıikov.
Qaraǵandy oblysy