Qart Torǵaıda ult ustazy Ahmet Baıtursynulynyń 150 jyldyǵyna arnalǵan merekelik is-sharalar bastaldy. Dúbirli toıǵa arnaıy kelgen Parlament Senatynyń tóraǵasy Máýlen Áshimbaev alashtyń qos alyby Ahmet Baıtursynuly men Mirjaqyp Dýlatuly eskertkishiniń saltanatty ashylý rásiminde quttyqtaý sóz sóıledi, dep habarlaıdy Egemen.kz.
«Qurmetti qaýym, qadirli Torǵaılyqtar! Aldymen barshańyzdy ult ustazy Ahmet Baıtursynulynyń 150 jyldyq mereıtoıymen shyn júrekten quttyqtaımyn! Jalpy, Ahań týraly aıtqanda, onyń qaıratkerligi men qalamgerligi qatar eske túsedi. ...Ult ustazy qazaq halqynyń zaman kóshinen qalmaýyn qalady jáne osy maqsatqa búkil ómirin arnady. Sondyqtan halyq úshin ómirin qıǵan Ahańdaı arysymyzdy ulyqtap, murasyn dáripteý, eńbegin nasıhattaý – bar qazaqtyń mindeti desek artyq bola qoımas. Bıyl osy mereıtoı aıasynda aýqymdy jumystar atqarylyp jatyr. Kóptegen eldi mekenderge, kóshelerge, nysandarǵa Ahmet Baıtursynulynyń esimi berildi. Ahańnyń kindik qany tamǵan Sarytúbekte kesenesi turǵyzyldy. Al dál qazir ashylyp jatqan eskertkishtiń Ahań men Jahańa arnalýynda úlken sımvolıkalyq mán bar. Sebebi eki arysymyz da ultty oıatý jolynda eńbek etti. Osy jolda Mirjaqyp Dýlatuly «Oıan, qazaq!» dep halqynyń sanasyna silkinis ákelgeni de barshamyzǵa belgili. Álıhan, Ahmet, Mirjaqyptar alash qozǵalysynyń basynda júrgen tulǵalar. Olar táýelsizdikti ańsady. Qazaqty azat el etýge umtyldy. Ahań men alashtyń birge atalýy zańdylyq. Sondyqtan bul eskertkishti barsha alash arystarynyń rýhyna taǵzym, solarǵa kórsetilgen qurmet dep qabyldaýymyz kerek. Emkertkishtiń Ahmet pen Mirjaqypqa arnalýynyń taǵy bir mańyzdy sebebi – qos qaıratkerdiń de osy óńirdiń týmasy bolýynda ekeni sózsiz. Jalpy, Torǵaı óńiri Ahmet pen Máirjaqyptaı talaı arystarymyz shyqqan qasterli meken. Ultymyz úshin bul ólkeniń orny bólek. Torǵaıdyń halqy eshqashan qazaqy qalpyn buzbaǵan, keshegi tar zamannyń ózinde ulttyq bolmysynan aınymaǵan. Torǵaı – alash rýhyn terbetken eldiktiń eńseli ordasy. Sondyqtan bul óńirdiń qadir-qasıeti erekshe. Biz muny árdaıym este saqtap júremiz», dedi Senat basshysy.
Qos alypqa qoıylǵan qola eskertkishtiń ashylý rásiminen keıin qonaqtar Torǵaıdaǵy Ahmet pen Mirjaqyp murajaıyna bas suqty. Bıyl ult ustazynyń mereıtoıy aıasynda bul mýzeı 170 mln teńgege bastan-aıaq jóndelip, ishi-syrty jańardy. Reekspozısııa jumystary júrgizildi.
Budan ári merekelik shara Jangeldın aýdanynyń ortalyǵy Torǵaıda jalǵasty. Munda bıyl Ahmet pen Mirjaqyp murajaıy 170 mln teńgege bastan-aıaq jóndelip, ishi-syrty jańardy.
Toı tústen keıin Ahmet Baıtursynulynyń kindik qany tamǵan Sarytúbek qonysy men Aqkól aýylynda jalǵasty. Mundaǵy is-shara arýaqtarǵa táý etýden bastaldy. Ahańnyń ataqonysy - Sarytúbektegi qorymda ult ustazynyń ákesi Baıtursyn men aǵasy Qalı jerlengen. Olardyń janyna bıyl halyq bop qarjy jıyp, Ahańa aq kesene turǵyzyldy.
Merekelik is-sharalar barysynda qazir Torǵaıda at báıgesi men palýandar beldesýi qyzyp jatyr. Keshke ortalyq stadıonda oblys ónerpazdarynyń konserti bastalady. Onda tek Ahańnyń ánderi ǵana shyrqalady.