Jýyrda qazaq kınoóndirisine taǵy bir fılm qosyldy. Jańa týyndy hakim Abaı týraly. Jalpy, buǵan deıin de aqyn týraly birneshe kórkem hám derekti fılm túsirilgen. Bul da sol danyshpan Abaıǵa qol sozǵan kezekti tyń týyndy. Kúni keshe ǵana el astanasynda «Abaıdyń sońǵy kúnderi» derekti fılminiń tusaýkeser rásimi ótti. Oıshyldyń aqyrǵy kúnderi týraly bir serııaly tarıhı kıno «Habar» agenttigi» AQ tapsyrysymen túsirilip otyr.
Aqyn ómirinde uly Maǵaýııanyń qazasy sumdyq aýyr bolǵanyn bilemiz. Baýyr eti balasynyń óliminen keıingi aqyrǵy qyryq kúnin Abaı qalaı ótkizdi? Ne kúı keshti? Ne aıtty? Fılm jáne ssenarıı avtorlary – jazýshy-jýrnalıst Qanat Tileýhan men ádebıetshi Baǵashar Tursynbaıuly osy suraqtarǵa jaýap izdep, hakimniń sońǵy qyryq kúndegi beınesi men rýhanı ahýalyn kórsetedi.
«Biz aqyn ómiriniń bir kezeńine ǵana toqtaldyq. 1904 jyly Balashaqpaq jaılaýynan Abaıdyń súıegi qaıtty. Ýásılá Maǵaýııaqyzynyń aıtýynsha, hakimniń demi Balashaqpaqtaǵy Qyryqoshaq degen jerde úzilgen. Osy Qyryqoshaqta bolǵan qaıǵyly oqıǵaǵa deıingi aqynnyń qyryq kúni fılmde qamtylǵan. Abaıdyń danyshpan ekenin bárimiz bilemiz de, qarapaıym adam ekenin qaperge ala bermeıtin sııaqtymyz. О́mirinde jasyp kórmegen, ǵajaıyp qaırat, kemel aqyl ıesi Ospan, Ábish qaıtys bolǵanda qatty kúızeldi. Biraq Maǵaýııa tiri bolatyn. Bar súıenishi, úmit artqany qasynda boldy. Alaıda jasynan jabysqan dert aqyry Maǵashty da alyp tynady. Bul qaza Abaı ómirindegi eń aýyr soqqy boldy. Kórermen qaýym aqyn beınesin jańa qyrynan kórip, ómiriniń sońǵy kúnderindegi rýhanı halin tanı túsedi dep úmit etemiz», deıdi Qanat Tileýhan.
Derekti fılm keıipkerlerimen qundy bolmaq. Olardyń bári Abaı elinde týǵan, aqyn ómiriniń shejireli qatparlarynan habary bar adamdar. Mysaly, Nástilek Sámenbetov – Abaıdyń shákirti, Ýáıis Shondybaıulynyń jıeni, Shaǵjan Isabaev – áıgili Beken Isabaevtyń uly, shejireshi, Qusman Berleshov – Táńirberdi Qunanbaıulynyń urpaǵy, Manataı Baltaqaıuly – Yrǵyzbaı tuqymy. Aıta keteıik, fılmniń rejısseri – Bekzat Smadııar, prodıýseri – aqyn Serik Qalıev.
«Abaıdyń sońǵy kúnderi» – «Habar» agenttigi bıylǵy jańa telemaýsymda kórermenge usynyp otyrǵan túrli janrdaǵy júzge tarta jobanyń biri jáne biregeıi. Agenttiktiń tapsyrysymen atalǵan jobany qolǵa alǵan belgili jýrnalıst, jazýshy Qanat Tileýhan bul týyndy arqyly búkil qazaqtyń qaıǵysyn arqalaǵan uly aqynnyń sońǵy 40 kúndegi ishki dúnıesindegi arpalysqa, tereń kúızeliske negiz bolǵan oqıǵalar arqyly úńiledi. Keıipkerlerdiń aıtýymen keıbir tyń derekterdi ashyp, kórermenge oı salady», dedi «Habar» agenttigi» AQ Basqarma tóraǵasy Berik Ýálı.
Tyń týyndyny kórermender Respýblıka kúnine oraı «Habar» telearnasynan tamashalaı alady.