Kaspıı teńizi men Qarakól kóliniń tazalyǵyn saqtaý – Mańǵystaý óńirindegi ózekti máselelerdiń biri. Biraq «ıt qoryǵan jerge ósh» degendeı, osy eki aıdynǵa las suıyqtyq nemese ózge de zııandy qaldyqtardy tógý áreketteri azaımaı tur. Kýágerler keleńsiz oqıǵany jelige júktep jarııalap jatady. Sodan soń ekologter baryp máseleniń mán-jaıyn anyqtaıdy, al belgisiz kúıde qalǵany qanshama degen oı keledi.
Jýyrda Qarakól kóline quıylǵan sýǵa qatysty shý shyqqan bolatyn. Osy shý endi basyla bergende Kaspıı teńizine arqyraǵan ekpinmen quıylǵan qop-qońyr las sýdyń kórinisi turǵyndardy taǵy mazalady.
Naqtyraq aıtsaq, 2022 jyldyń 11 qyrkúıek kúni keshki ýaqytta áleýmettik jelide Prımorskıı eldi mekeninde ornalasqan «MAEK-Qazatomónerkásip» JShS-ne qarasty №1 JEO aǵyndy kanalyndaǵy sýdyń lastanýy týraly beınejazba taraldy.
Mańǵystaý oblysy boıynsha ekologııa departamentiniń málimetine súıensek, atalǵan kanalǵa «Kaspıı sý tushytý zaýyty» JShS jáne «Orbıta» sport kesheni tógindi jumystaryn júrgizedi.
«Mańǵystaý oblysy boıynsha ekologııa departamentiniń mamandary jedel túrde oqıǵa oryn alǵan jerge baryp, arna boıyndaǵy lastaný aýmaǵyna sholý jumystaryn júrgizdi. Tekserý barysynda № 1 JEO Kaspıı teńizine shyǵaratyn qubyrynyń kózinen, «MAEK-Qazatomónerkásip» JShS arnaǵa tógý kózinen jáne «Kaspıı tushytý zaýyty» JShS tógindi qubyry kózinen sý synamalary alyndy. Alynǵan synamalardyń nátıjeleri boıynsha «Kaspıı tushytý zaýyty» JShS-niń aǵyzý qubyrynyń kózinen jáne № 1 JEO Kaspıı teńizine shyǵaratyn qubyrynyń kózinen alynǵan synama quramynda temirdiń jáne fosfattyń, mystyń artyq mólsheri anyqtaldy. Anyqtalǵan faktiler boıynsha zańnamada belgilengen tártippen qajetti sharalar qabyldanyp, atqarylǵan jumystardyń nátıjeleri týraly qosymsha habarlanatyn bolady», deıdi atalǵan departament ókilderi.
Sonymen qatar departament mamandary «Pudslushano_aktau» áleýmettik jelisine 11 qyrkúıek kúni kúndiz jarııalanǵan beınetúsirilimdegi «Dostar» qonaq úıiniń artqy jaǵalaýdaǵy teńizdiń qyzǵylt túske boıalýyna shalandar sebep bolyp otyrǵanyn aıta kele, departament tarapynan túsirilgen foto jáne beınetúsirilimderi bar ekendigin jetkizdi.
Qaı jaǵdaıda bolsyn, Ekologııa departamenti ekologııaǵa qatysty oryn alǵan oqys oqıǵalardyń zııan-zardabyn anyqtap, kinálilerdiń zańǵa saı jazaǵa tartylǵanyn aıtady. Jaza jeńil me, álde jazany aınalyp ótetin jol bar ma, áıteýir Mańǵystaýda sý kózderin lastaýshylar zańbuzýshylyq áreketterin tyımaı otyr...
Mańǵystaý oblysy