Qazaqstan Prezıdenti Qasym-Jomart Toqaev álemdegi geostrategııalyq shıelenis jaǵdaıynda TMD elderi arasynda ózara senimdi nyǵaıtý, turaqtylyq pen qaýipsizdikti qamtamasyz etý úshin odan da kóp kúsh qajet ekenin aıtty, dep habarlaıdy Egemen.kz.
Memleket basshysy TMD-da kúsh jáne quqyq qorǵaý organdarynyń ózara is-qımylynyń teńgerimdi júıesi qurylǵanyn, qaýipsizdik salasyndaǵy tujyrymdamalyq qujattar qabyldanǵanyn atap ótti.
«Sonymen qatar biz jańa táýekelder men qaýipterge den qoıý úshin aldyn alý sharalaryn jedel ázirleýimiz qajet. Qazaqstan TMD memleketteriniń terrorızm men ekstremızmge qarsy kúrestegi yntymaqtastyqtyń uıymdyq-quqyqtyq tetikterin jetildirý jónindegi birlesken tásilderimen bólisedi. Biz búgin qabyldanyp jatqan ekstremızmge qarsy kúres baǵdarlamasynyń mindetterin iske asyrý boıynsha tyǵyz úılestirilgen jumysqa daıyn ekenimizdi bildiremiz», dedi Qasym-Jomart Toqaev TMD memleketteri basshylary keńesiniń otyrysynda.
Aıta ketsek, búgin Astanada QR Prezıdenti Qasym-Jomart Toqaevtyń basshylyǵymen elimizdiń Táýelsiz Memleketter Dostastyǵyndaǵy aǵymdaǵy tóraǵalyǵy aıasynda TMD memleketteri Basshylary Keńesiniń otyrysy ótýde.