Polısııa Pavlodardaǵy mektepterdiń birinde bolǵan janjal faktisi boıynsha tekserý júrgizýde, dep habarlaıdy Egemen.kz.
«14 qazan kúni saǵat 17.26-da Pavlodar qalasynyń polısııasyna Tkachev kóshesinde ornalasqan mekteptiń oqýshylary arasyndaǵy janjal faktisi boıynsha habarlama kelip tústi. Polısııa qyzmetkerleri úzilis kezinde saǵat 16.35-te baspaldaq alańynda 7-shi jáne 8-shi synyptardyń (2008 jáne 2009 jyly týǵan) eki oqýshysy arasynda ıyq soqtyǵysýyna baılanysty janjal týyndaǵanyn anyqtady. Kámeletke tolmaǵandardyń biri ekinshisiniń beti men jelke aımaǵyna keńse pyshaǵymen dene jaraqatyn salǵan, sondaı-aq óziniń oń qolynyń saýsaqtaryn jaraqattaǵan», dep habarlady Jergilikti polısııa qyzmetiniń aǵa ınspektory Araı Tólemisova.
Kámeletke tolmaǵandar aýrýhanaǵa jetkizilip, tekserýden keıin ekeýi de úıge ambýlatorııalyq negizde jiberilgen.
Jábirlenýshiniń ata-anasy aryz berýden bas tartty.
Dene jaraqatyn keltirgen oqýshynyń zańdy ókilderine qatysty QR ÁQBtK-niń 127-baby boıynsha ákimshilik is qozǵaldy.