Elordanyń Shubar shaǵyn aýdany 2023 jyldan bastap gazdandyryla bastaıdy. Osy jyldyń sońyna deıin saraptamanyń oń qorytyndysyn alý josparlanyp otyr. Qazirgi ýaqytta jobalaý-izdestirý jumystary júrgizilýde, dep habarlaıdy Egemen.kz Astana ákimdigine silteme jasap.
Saryarqa jáne Almaty aýdandarynda úılerdi gazǵa qosý múmkindigi tolyq qamtamasyz etilgen. Iаǵnı 10 turǵyn alaby men 4 shaǵyn aýdanǵa (Aqbıdaı, Qazaqaýyl, Nur-Besik, Potanın kóshesi aýdanyndaǵy shaǵyn aýdan) osyndaı múmkindik jasaldy. Osy maqsatta qalada 680 shaqyrymnan astam gaz taratý jelisi salynyp, kvartalishilik jeliler tartyldy. Atalǵan aýdandarda 6,5 myńǵa jýyq turǵyn úılerin gazǵa qosty.
Qazirgi ýaqytta Baıqońyr jáne Esil aýdandarynda gaz qubyryn salý jumysy júrip jatyr. Bıyl aýdandyq Turan, Telman qazandyqtaryna, sol sııaqty Ilınka (Úrker), О́ndiris, Telman, Prıgorodnyı eldi mekenderine jáne «Family Village» jáne «Garden Village» shaǵyn aýdandaryna gaz jetkizý jelileriniń qurylysy bastalyp ketti.
«Gazdandyrý boıynsha yntalandyrý jáne kómek kórsetý úshin birqatar áleýmettik shara qabyldandy: úılerdi gazǵa qosýǵa arnalǵan qujattar tizimi eki ese qysqartyldy, muqtaj jandarǵa bólinetin soma 2 eseden asa ulǵaıtyldy (430 myńǵa deıin), tegin negizde gazdy esepke alý aspaptary (eseptegishter) beriledi, gazdandyrý úshin bankter arqyly bólip tóleý jáne paıyzsyz kredıtteý bar», delingen habarlamada.
Aıta ketsek, JEO-1 jáne JEO-2-de sý jylytý qazandyqtary tolyqtaı gazǵa aýystyryldy. Sondaı-aq áleýmettik nysandardy gazǵa qosý jumysy júrgizilip jatyr. Osylaısha, 20 áleýmettik nysannyń (Almaty jáne Saryarqa aýdany) 13-i gazǵa aýystyryldy, qalǵan 7 nysan boıynsha iske qosý-jóndeý jumystary júrgizilýde. Buryn olar avtonomdy jylý kózderi arqyly jylytylyp kelgen. Atalǵan obektilerdi gazǵa aýystyrý esebinen jalpy únemdeý jylyna 1 mlrd teńgeden asady.