Memleket basshysy Úkimetke turǵyn úı qurylysy men tozyǵy jetken turǵyn úılerdiń kúrdeli jóndeý jumystaryn qarjylandyrýdy ulǵaıtýdy tapsyrdy, dep habarlaıdy Egemen.kz.
«Aımaqtyń aldynda teńgerimdi aýmaqtyq damýǵa qol jetkizý boıynsha mańyzdy mindet tur. Bul jumystaǵy negizgi kórsetkishter azamattardyń negizgi áleýmettik qyzmetterge teń jáne keń qoljetimdiligin qamtamasyz etý, turǵyn úı-kommýnaldyq jaǵdaıyn jaqsartý. Jyl basynan beri oblysta 686 myń sharshy metr turǵyn úı paıdalanýǵa berilgenimen, turǵyn úı máselesi óńirdiń ótkir máseleleriniń biri bolyp qalyp otyr. Bir ǵana oblystaǵy saıajaılarda 180 myńnan astam adam turaqty turady», dedi Prezıdent.
Sondaı-aq Memleket basshysy qalada tozyǵy jetken turǵyn úılerdiń kóp ekendigin atap ótti.
«Oblysta apatty jaǵdaıdaǵy turǵyn úıler kóp. Sondyqtan Úkimetke turǵyn úı qurylysy men tozyǵy jetken turǵyn úılerdiń kúrdeli jóndeý jumystaryn qarjylandyrýdy ulǵaıtý tapsyryldy», dedi Prezıdent.
Sonymen qatar Ishki ister mınıstrligine zańsyz qoqys úıindilerin jasaýshylardy jaýapkershilikke tartýdy tapsyrdy.
«О́ńir úshin ózekti másele – qaldyqtardy kádege jaratý. Barlyq týrıstik marshrýttardy konteınerlermen jabdyqtap, qoqystardy ýaqytyly shyǵarý men suryptaýdy uıymdastyrý qajet. Bul mańyzdy suraq. Ishki ister mınıstrligine zańsyz qoqys úıindilerin jasaýshylardy jaýapkershilikke tartý boıynsha jumysty kúsheıtýdi tapsyramyn», dep atap ótti Q.Toqaev.