Qarasha aıynda sybaılas jemqorlardan alynǵan aqsha mektep qurylysyna baǵyttala bastaıdy. Bul týraly Túrkistan oblysyna jumys sapary aıasynda QR Premer-Mınıstri Álıhan Smaıylov óńirdiń keshendi áleýmettik-ekonomıkalyq damý máseleleri jóninde ótken keńes otyrysynda aıtty, dep habarlaıdy Egemen.kz Úkimettiń baspasóz qyzmetine silteme jasap.
Keńeste oblys ákimi Darhan Satybaldy óńirdegi aǵymdaǵy ahýal, negizgi ekonomıkalyq kórsetkishter men ınvestısııalyq jobalardy iske asyrý barysy týraly baıandady. Sonymen qatar ındýstrııa jáne ınfraqurylymdyq damý mınıstri Qaıyrbek О́skenbaev, mádenıet jáne sport mınıstri Dáýren Abaev, birinshi energetıka vıse-mınıstri Murat Júrebekov, aýyl sharýashylyǵy vıse-mınıstri Jeńis О́serbaı jáne oqý-aǵartý vıse-mınıstri Ǵanı Beısembaev baıandama jasady.
Baıandamashylardy tyńdap bolǵannan keıin Premer-Mınıstr bıyl oblysty damytýǵa respýblıkalyq bıýdjette 367 mlrd teńgeden astam qarajat qarastyrylǵanyn atap ótti. Bıýdjetti naqtylaý kezinde taǵy 100 mlrd teńge bólindi.
«Bul qarajat ınjenerlik ınfraqurylymdy damytýǵa, áleýmettik máselelerdi sheshýge jáne óńirdiń agroónerkásip keshenin qoldaýǵa baǵyttalǵan. Jyl sońyna deıin az ýaqyt qaldy, sondyqtan josparlanǵan nátıjelerge qol jetkizý úshin bıýdjet qarajatyn maqsatty jáne tıimdi paıdalanýdy qamtamasyz etý qajet», dedi Álıhan Smaıylov.
Sonymen qatar Úkimet basshysy Qoja Ahmet Iаsaýı kesenesiniń saqtalýyn qamtamasyz etý qajettigine nazar aýdardy. Premer-Mınıstr qazirgi ýaqytta kesene aınalasynda qarqyndy qurylys júrip jatqanyn, oǵan kelýshiler sany da edáýir artqanyn atap ótti. Osyǵan baılanysty ákimdik IýNESKO men basqa da halyqaralyq uıymdardyń usynymdaryn qatań saqtaýy kerek.
Ekonomıkalyq máselelerge toqtalǵan Álıhan Smaıylov azamattardyń ál-aýqatyn arttyrý úshin birinshi kezekte óńirdiń damýyna serpin beretin jańa ınvestısııalyq jobalardy iske qosý jóninde sharalar qabyldaý qajet ekenin atap ótti. Máselen, bıyl oblysta 33 mlrd teńgege 29 jobany iske asyrý josparlanǵan. Budan bólek 1,9 trln teńgege taǵy 74 joba talqylanyp jatyr.
«Jańa ınvestısııalyq jobalardy iske asyrý arqyly jańa jumys oryndaryn ashý kerek. Oblys ákimdigi josparlanǵan jobalardyń barlyǵyn merziminde ári sapaly iske qosýdy qamtamasyz etýi qajet», dedi Álıhan Smaıylov.
Sonymen qatar Premer-Mınıstr azyq-túlik tapshylyǵyna jáne baǵanyń negizsiz ósýine jol bermeý úshin barlyq qolda bar naryqtyq mehanızmderdi tıimdi paıdalaný, oblystyń ınfraqurylymy men agroónerkásip keshenin damytý boıynsha keshendi jumys júrgizý, sondaı-aq «Jaıly mektep» ulttyq jobasy boıynsha óńirdegi oqýshy oryndarynyń sanyn ulǵaıtý jóninde sharalar qabyldaý qajettigin atap kórsetti.
«Memleket basshysynyń tapsyrmasy boıynsha sybaılas jemqorlardan alynǵan qarajat endi mektepter men olarǵa qosymsha qurylystar salýǵa baǵyttalatyn bolady. Búgingi tańda respýblıka boıynsha 100 mlrd teńge týraly sóz bolyp otyr. Qarajat bólý qarasha aıynda bastalady», dedi Premer-Mınıstr.