Senat tóraǵasynyń orynbasary Asqar Shákirov EQYU Parlamenttik Assambleıasynyń Ekonomıkalyq máseleler, ǵylym, tehnologııa jáne qorshaǵan orta jónindegi komıtetiniń keńesine onlaın túrde qatysyp, sóz sóıledi. Onda EQYU óńirindegi ekonomıkalyq jáne ekologııalyq qaýipsizdikti qamtamasyz etýdiń ózekti máseleleri talqylandy, dep habarlaıdy Egemen.kz Parlament Senatynyń baspasóz qyzmetine silteme jasap.
Qazaqstan ókili, Parlamenttik Assambleıa Tóraǵasynyń orynbasary jáne Assambleıanyń Ornyqty damý salasyndaǵy maqsattar jónindegi arnaýly ókili bolyp tabylatyn senator óz sózinde Aral teńiziniń problemasyna eýropalyq parlamentshilerdiń nazaryn aýdardy. Bul tek 60 mıllıonnan astam halqy bar Aral aımaǵyndaǵy memleketter úshin ǵana emes, búkil álem qoǵamdastyǵy úshin de syn-qaterge aınaldy.
Aral teńiziniń qurǵaýy BUU-nyń adam áreketinen týyndaǵan eń aýyr ekologııalyq apat retinde tanylǵany barshaǵa belgili jáne ony sheshý úshin búkil álem qoǵamdastyǵynyń kúsh-jigerin biriktirý qajet.
Osy máseleni sheshý maqsatynda EQYU-nyń yqtımal úlesin talqylaý úshin komıtet depýtattaryna, sondaı-aq EQYU-nyń múddeli parlamentshilerine ahýalmen egjeı-tegjeıli tanysýǵa Aral óńirine barý usynyldy.
Bul bastamany Qazaqstannyń klımattyń ózgerýine qarsy júzege asyp jatqan kúres aıasynda qarastyrǵan jón. Aǵymdaǵy jyldyń shilde aıynda Bırmıngemde ótken EQYU PA-nyń jyl saıynǵy sessııasynda Qazaqstan men О́zbekstannyń parlamenttik delegasııalary Aral teńizin qutqarýǵa baılanysty jobalardy úılestirýge qatysýǵa donor elderdi shaqyrǵan bolatyn.
Komıtet bıýrosy osy másele boıynsha 2023 jyldyń birinshi jartysynda EQYU Parlamenttik Assambleıasynyń delegasııasyn Aral óńirine jiberý týraly usynysqa qoldaý bildirdi.