2022 jyldyń qyrkúıek aıynda ekinshi deńgeıli bankter men banktik emes jekelegen aıyrbastaý pýnkterinde jalpy salmaǵy 124,66 keli 3 099 altyn quıma satyldy, dep habarlaıdy Egemen.kz Ulttyq bankke silteme jasap.
Halyqqa tazartylǵan altyn quımalardy satý jáne satyp alý baǵdarlamasyn (budan ári – Baǵdarlama) Ulttyq Bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 3,6 tonna 104 945 altyn quıma satyldy.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi 25% – 26 706 dana. Odan keıin 5 gramdyq quıma – 22 600 dana (22%) jáne 20 gramdyq quıma – 22 275 dana (21%), 100 gramdyq quıma – 21 126 dana (20%), al 50 grammdyq quımadan – 12 238 dana (12%). Altyn quımalar Almaty, Nur-Sultan jáne Atyraý qalalarynda kóp satylady.
Aıta keteıik, altyn quımalar senimdi ınvestısııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.
Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 417 keli 16 588 altyn quımany keri satyp alǵan, bul – jalpy satylǵan altyn quımalardyń 16%-y. Olar keri satyp alǵan altyn quımalardyń barlyǵy derlik Ulttyq Banktiń fılıaldary arqyly halyqqa satylady.
Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapta shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap sapa sertıfıkaty da bolyp sanalady.