Búgin Parlament Senatynyń «О́ńir» depýtattyq tobynyń otyrysy ótti. Kezdesý barysynda elimizdegi ınjenerlik-kommýnıkasııalyq ınfraqurylymnyń qazirgi jaı-kúıi talqylandy, dep habarlaıdy Egemen.kz.
Basqosýǵa ortalyq atqarýshy organ ókilderi, «Qazaq Gaz» AQ, «KazTransOil» AQ jáne «KEGOC» AQ ókilderi qatysty. QR IIDM Qurylys jáne turǵyn úı-kommýnaldyq sharýashylyq isteri komıtetiniń tóraǵasy Tımýr Qaraǵoıshınniń aıtýynsha, búginde mınıstrlik elimizdiń sýmen jabdyqtaý, sý burý jáne jylýmen jabdyqtaý júıelerin damytýdyń úsh negizgi baǵyty boıynsha jumys júrgizip jatyr. Bul jumystar Memleket basshysynyń jeliler men qýattardyń tozýyn qysqartý, sondaı-aq ınnovasııalardy engizý úshin pármendi yntalandyrýdy ázirleý týraly tapsyrmasy sheńberinde júzege asyrylyp keledi.
Sonymen qatar spıker Ulttyq ekonomıka mınıstrligimen birlesip jańa tarıftik saıasat sheńberinde jelilerdiń tozý kórsetkishin 15 paıyzǵa deıin tómendetý boıynsha jumys júrgizilip jatqanyn habarlady.
Jergilikti atqarýshy organdardyń derekterine súıensek, sýmen jabdyqtaý jáne sý burý jelileriniń jalpy uzyndyǵy shamamen 118,6 myń shaqyrymdy quraıdy. Turǵyn úı-kommýnaldyq ınfraqurylymdy damytý tujyrymdamasy sheńberinde 2026 jylǵa qaraı jelilerdiń tozýyn 45 paıyzǵa deıin tómendetý josparlanýda. Bul mejege qol jetkizý úshin mınıstrlik respýblıkalyq bıýdjetten qarajat bólýdiń eki tetigin iske asyrýda.
«Birinshi tetik nesıe alýshy úshin qolaıly sharttarmen bıýdjettik kredıtteýdi qarastyrady (jyldyq syıaqy mólsherlemesi – 0,01%; nesıeleý merzimi – 20 jylǵa deıin; negizgi boryshty tóleý boıynsha jeńildikti kezeń – 6 jyl; bıýdjettik kredıtti ıgerý kezeńi – 2 jyl).
Ekinshi tetik – jylýmen, sýmen jabdyqtaý jáne sý burý júıelerin salýdy, rekonstrýksııalaýdy jáne jańǵyrtýdy sýbsıdııalaý. Sýbsıdııa ınvestısııalyq jobalardy qarjy ınstıtýttarynyń (Eýropalyq Qaıta Qurý jáne damý banki, Azııa Damý Banki jáne t. b.) qosa qarjylandyrý sharttaryna sáıkes beriledi», delingen habarlamada.
Aıta ketsek, atalǵan eki mehanızm arqyly 79 tabıǵı monopolııa sýbektisi qarjylandyrylady.