Oftalmologııalyq skrınıng jasaıtyn zamanaýı dıagnostıkalyq qural-jabdyqtarǵa qol jetkizgen elimizdegi 10 Perınataldyq ortalyq bıylǵy jarty jylda jańa týǵan 1265 náresteniń kózin tekserip, 181 balada retınopatııa bar ekenin anyqtaǵan, dep habarlaıdy Egemen.kz.
Osylaısha otandyq oftalmolog-dárigerler AYALA QQ satyp ápergen jabdyqtardyń kómegimen kóz torynyń lazerkoagýlıasııasyn jasap, toǵyz balanyń kórý qabiletin saqtap qaldy.
Qazaqstandyq dárigerlerdiń málimetine súıensek, aıy-kúni jetpeı týǵan nárestelerdiń 40% jýyǵy kórý qabileti qaıtyp qalpyna kelmeıtin keselge dýshar bolady.
Syrttaı qaraǵanda retınopatııanyń belgileri kórinbeıdi. Tek mamandandyrylǵan jáne arnaýly bilimi bar oftalmologtar ǵana oftalmoskop kómegimen onyń belgilerin erte anyqtaı alady.
2022 jylǵa deıin Qazaqstannyń Perınataldyq ortalyqtaryn retınopatııanyń erte skrınıngine arnalǵan jabdyqtarmen jabdyqtaý ońaıǵa túspegen. Ol tek 4 ortalyqta ǵana bar boldy. Oǵan qosa QR Densaýlyq saqtaý mınıstrligi bekitken retınopatııanyń kúrt damyǵan túrin ıneksııalyq emdeıtin klınıkalyq hattamanyń bolmaýy da jaǵdaıdy ýshyqtyryp, sonyń saldarynan soqyr bolyp qalatyn balalar sany jyl saıyn kóbeıe túsken edi.
Osyndaı kúrdeli máseleni sheshýge 2021 jyldyń qazan aıynda AYALA qaıyrymdylyq qorynyń negizin qalaǵan ári prezıdenti Aıdan Súleımenova aralasyp, QR Densaýlyq saqtaý vıse-mınıstri Jandos Búrkitbaevpen birqatar kezdesý ótkizgen edi. Oǵan qosa QR Densaýlyq saqtaý mınıstrligi Ana men bala densaýlyǵyn qorǵaý departamentiniń basshysy Maǵrıpa Embergenovamen birge qazaqstandyq Perınataldyq ortalyqtardyń jańa týǵan nárestelerdiń oftalmologııalyq skrınıngine arnalǵan jabdyqtarǵa, sondaı-aq kadrlarǵa degen qajettilikterine jan-jaqty taldaý júrgizilipti.
«Qazaqstanda shala týǵan náresteler dúnıege keletin 42 Perınataldyq ortalyqta balalardyń retınopatııasyn anyqtaý úshin oftalmologııalyq skrınıng júrgize alatyn nebári 23 oftalmolog bar. Biz skrınıngtik jabdyqtarmen qosa, eń aldymen arnaýly mamandar jumys isteıtin ortalyqtardy qamtamasyz etý kerektigin túsindik. Sondyqtan eki demeýshimen birge 11 Perınataldyq ortalyqqa jáne Atyraý qalasyndaǵy Oblystyq oftalmologııalyq aýrýhanany nazarǵa aldyq. Nátıje bizdiń boljamdarymyzdan da asyp tústi – alty aıda kózinde keseli bar sábıler sany 1200-den asty. Sonymen qatar, skrınıng retınopatııadan basqa da kóz kinárattaryn anyqtaýǵa septesti. Mysaly, Atyraýda 136 balanyń 74-inde retınopatııaǵa jatpaıtyn, biraq aıtarlyqtaı aýytqý anyqtaldy. Kóz patologııasyn erte anyqtaý dárigerlerge de emdi erte, asqyndyrmaı bastaýǵa jáne balalardyń jaqsy kórý qabiletterin saqtaýǵa kómektesti. Bul qaıyrymdylyq qory, Densaýlyq saqtaý mınıstrligi men memlekettik medısınalyq ortalyqtardyń ózara jemisti áreketiniń nátıjesi», deıdi AYALA qaıyrymdylyq qorynyń prezıdenti Aıdan Súleımenova.
Joǵarydaǵy oftalmoskoptardan bólek, Aqtóbe, Semeı jáne Taraz qalalaryndaǵy oblystyq perınataldyq ortalyqtaryndaǵy AYALA qorynyń bokstary arqyly jınalǵan qarajatqa retınopatııamen týǵan nárestelerdiń kóz toryn lazerkoagýlıasııalaý otasyn júrgizýge arnalǵan apparattar ornatylǵanyn aıta ketý kerek. 52 mıllıon teńgeden astam somaǵa satyp alynǵan, tájirıbeli hırýrg-oftalmologtardyń qolyna túsken bul apparattar jańa týǵan 9 náresteniń kózin saqtap qalýǵa kómektesti.
Oǵan qosa osy qyrkúıek aıynda Densaýlyq saqtaý mınıstrligi jańa týǵan nárestelerge «Lýsentıs» preparatyn ıntravıtrealdy engizý jónindegi klınıkalyq hattamany bekitti. Oftalmolog dárigerler bul sheshim Qazaqstanda shala týǵan nárestelerdiń retınopatııasyn nátıjeli emdeýge serpin bere alady dep otyr.
«Birneshe jyl buryn ǵana qazirgi qolymyzdaǵy jabdyqtardyń barlyǵy – ýltra zamanaýı bınokýlıarlyq oftalmoskoptar, sábılerdegi soqyrlyqty emdeýdiń jalǵyz ádisi – lazerlik qondyrǵylar, «Lýsentıs» ıneksııasy arqyly retınopatııany emdeýge arnalǵan klınıkalyq hattama biz úshin qol jetpes arman bolatyn. Endi bizde shala týǵan balalarǵa álem sulýlyǵyn, al otbasylaryna qýanysh pen baqyt syılaıtyn múmkindik paıda boldy. Al biz mamandardyń talaıy senbegen, balalarǵa oftalmologııalyq kómek kórsetýdiń keremet múmkindikterin syılaǵan Aıdan Súleımenovaǵa alǵys aıtamyz», deıdi QR Kóz aýrýlary ǴZI oftalmolog dárigeri Ásel Sháripova.
Osylaısha ózi de burynǵy terapevt-dáriger Aıdan Súleımenova 15 jyldan beri balalar densaýlyǵyn saqtaýdaǵy saýapty istermen aınalysyp keledi. Ol negizgi qarajatyn memleket kómegin kúsheıte túsý úshin Qazaqstandaǵy balalar ólim-jitimi men múgedektikti azaıtýǵa baǵyttap otyr. 2007 jyldan beri Aıdan Súleımenova 1,5 mıllıard teńgeni quraıtyn jeke qarajatyna elimizdegi kópbeıindi 30 balalar aýrýhanasy men perınataldyq ortalyqtarynyń jansaqtaý bólimshelerin ozyq medısınalyq tehnologııalarmen jabdyqtap kele jatyr. AYALA QQ prezıdenti tek shala týǵan sábılerdiń retınopatııasynan týyndaıtyn balalar zaǵıptyǵyn tómendetý jobasyna 28 950 000 teńge bólse, onyń 16 810 000 teńgesi 2022 jyly oftalmologııalyq skrınıngke arnalǵan jabdyqtarǵa, al 12 140 000 teńgesi Almatydaǵy Qalalyq perınataldyq ortalyqqa retınaldyq kamera satyp alýǵa jumsaldy.