Máskeýdegi Qazaqstan elshiliginde «Alash» partııasy kóshbasshylarynyń biri, qazaqtyń kórnekti qoǵam jáne memleket qaıratkeriniń ómiri men qyzmeti týraly jazylǵan «Alıhan Býkeıhanov. Chelovek-epoha» (Álıhan Bókeıhanov. Ańyz adam) kitabynyń tusaýkeseri ótti, dep habarlaıdy Egemen.kz.
Kitap avtory - reseılik ǵalym, tarıh ǵylymdarynyń doktory, professor Vıktor Kozodoı.
Avtor óz eńbeginde derekkózderdi, materıaldar men faktilerdi, sonyń ishinde buryn ǵylymı aınalymda paıdalanylmaǵan muraǵat qujattaryn, estelikterdi, sol jyldardaǵy gazet-jýrnal betterindegi jarııalanymdardy paıdalanǵan.
Buǵan deıin kitaptyń tusaýkeseri Qazaqstannyń bes qalasynda (Astana, Almaty, Pavlodar, Semeı, Qaraǵandy) sátti ótken bolatyn. Endi reseılik ǵalymdar men sarapshylardyń qatysýymen Máskeý qalasynda ótti.
Jıyndy ashqan Qazaqstannyń Reseıdegi elshisi Ermek Kósherbaev bul kitap Qazaqstannyń táýelsizdigin boljaǵan tarıhı oqıǵalardy zertteýge eleýli úles qosty dep esepteıdi.
Shara barysynda Ermek Kósherbaev Vıktor Kozodoıǵa 2-dárejeli «Dostyq» ordenin jáne Qazaqstan Respýblıkasy Prezıdentiniń Alǵys hatyn tabys etti.
О́z kezeginde ǵalym Qazaqstan basshylyǵyna joǵary marapaty úshin alǵys aıtyp, kitapty eki el halyqtary arasyndaǵy dostyqty nyǵaıtýǵa qosqan úlesi ekenin jetkizdi. Onyń pikirinshe, Álıhan Bókeıhanovty Qazaqstannyń ǵana emes, Reseıdiń de tarıhı qaıratkeri dep sanaýǵa bolady, óıtkeni ol Memlekettik Dýmaǵa saılandy, Búkilreseılik uıymdardyń jumysyna jáne Búkilreseılik máselelerdi sheshýge qatysty.
Sóz sońynda Vıktor Kozodoı kitaptyń qazaq tiline aýdarylǵanyn aıtyp, jaqyn arada jaryq kóretinin habarlady.