Premer-Mınıstr Álıhan Smaıylovtyń tóraǵalyǵymen ótken Úkimet otyrysynda Ulytaý oblysynyń 2022-2026 jyldarǵa arnalǵan áleýmettik-ekonomıkalyq damýynyń keshendi jospary maquldandy, dep habarlaıdy Egemen.kz Primeminister.kz saıtyna silteme jasap.
Ulttyq ekonomıka mınıstri Álibek Qýantyrov jospardyń jobasy Memleket basshysynyń tapsyrmasy boıynsha ázirlengenin habarlady. Ony iske asyrýǵa shamamen 1,4 trln teńge ınvestısııa tartý josparlanýda, bul ártúrli salalarda 120-dan astam is-sharany oryndaýǵa múmkindik beredi.
Máselen, 9 jańa zaýyt pen ónerkásiptik keshen, aýyl sharýashylyǵy ónimderin óndirý jáne qaıta óńdeý boıynsha 11 ınvestısııalyq joba iske qosylady. Turǵyn úı-kommýnaldyq sharýashylyq salasynda 130 km jylý jelilerin, 300 km sý qubyry jelilerin jáne 127 km sý burý jelilerin salý jáne jańǵyrtý josparlanýda.
Medısınalyq mekemelerdiń jetispeýshiligi problemalaryn sheshý úshin 5 densaýlyq saqtaý obektisin salý jáne kúrdeli jóndeýden ótkizý kózdelgen. Bilim berý salasynda 880 balaǵa arnalǵan 4 jańa balabaqsha men 1100 oqýshyǵa arnalǵan 4 oqýshylar saraıyn iske qosý josparlanýda, sondaı-aq memlekettik tehnıkalyq ýnıversıtet ǵımaratyn salý máselesi pysyqtalady.
«Mádenıet jáne sport salasynda 6 mádenıet nysany, onyń ishinde mýzykalyq-drama teatry, amfıteatr jáne 10 sport nysanyn salý jáne rekonstrýksııalaý josparlanýda. Budan basqa, turǵyn úı problemalaryn sheshý úshin shamamen 137 úıge áser etetin Jezqazǵan qalasynyń turǵyn úı qoryn jáne temirjol vokzaly jáne áýejaı ǵımaratyn jańartý júrgiziletin bolady. Budan basqa, elimizdiń basqa qalalarymen áýe qatynasynyń jańa baǵyttary ashylady dep boljanýda, sondaı-aq 400 shaqyrymǵa jýyq avtojol salý, rekonstrýksııalaý jáne jóndeý kózdelgen», delingen Úkimet habarlamasynda.
Sonymen qatar shaǵyn jáne orta bıznesti damytý jáne óńirdiń mıneraldyq-shıkizat bazasyn keńeıtý jóninde sharalar qabyldanady.
Jıyn barysynda oblys ákimi Berik Ábdiǵalıuly baıandama jasady.
Premer-Mınıstr metallýrgııa, hımııa, jeńil ónerkásip jáne mashına jasaý salasyn damytý baǵytynda Ulytaýdyń áleýeti óte zor ekenin atap ótti. Qazaqstandaǵy eń iri mys óndirýshi kásiporyn Ulytaý jerinde ornalasqan.
«Keshendi jospardy oryndaý jańa oblystyń damýyna aıtarlyqtaı serpin beredi jáne óńir halqynyń ál-aýqatyn arttyrýǵa jaǵdaı jasaıdy. Sonymen qatar turǵyn úı jáne kólik ınfraqurylymyn, áleýmettik salany damytý boıynsha jobalar iske asyrylyp, ekologııalyq problemalar sheshiledi», dedi Álıhan Smaıylov.
Onyń aıtýynsha, metallýrgııa ónerkásibi men aýyl sharýashylyǵyn qarqyndy damytýǵa erekshe nazar aýdarylady.
Jeke ınvestısııalar esebinen ortasha qýatty munaı óńdeý zaýyty, bıoelektr stansııasy men hımııa zaýyty salynady.
Sonymen qatar energetıka salasynda №2 Jezqazǵan jylý elektr stansııasyn salý jáne Sátbaev qalasynda №1 jylý stansııasyn jańǵyrtý kózdelip otyr. Al kásipkerlikti damytý úshin Jezqazǵanda kóterme-taratý ortalyǵy, 3 qonaq úı kesheni, demalys úıi salynady. Sondaı-aq jergilikti bıýdjet qarajaty esebinen «Tabysqa jetý joly» atty bıznesti qoldaýdyń óńirlik baǵdarlamalary ázirlenedi.
«Eń bastysy, 2026 jylǵa deıin 9,5 myńǵa jýyq jańa jumys orny qurylady. Kórip otyrǵanymyzdaı, Keshendi josparda birqatar óte mańyzdy is-shara qamtylǵan», dedi Álıhan Smaıylov.
Sondaı-aq «Eńbek» fýtbol klýby jandanyp, «Arystan» balalar hokkeı mektebi ashylady. 2023 jyldyń 1 qyrkúıeginen bastap jańa Ulytaý memlekettik tehnıkalyq ýnıversıtetine stýdentterdi qabyldaý josparlanýda.
Halyq sanynyń ósýin eskere otyryp, Jezqazǵan qalasynda 60 úıdi nemese 1800-ge jýyq páterdi qamtıtyn úsh jańa shaǵyn aýdan salynady. Jeke turǵyn úı qurylysyna 1 myń ýchaske bólinedi. Sondaı – aq, Jezqazǵan qalasyndaǵy 26 apatty úıdi jáne Sátbaev qalasyndaǵy 20 apatty úıdi jańartý jumystary júrgiziledi. Atalǵan is-sharalarǵa 62 mlrd.teńgeden astam qarajat baǵyttalady.
Turǵyn úı-kommýnaldyq sharýashylyqty jańǵyrtý aıasynda 130 km jylý jelileri salynyp, jańǵyrtylady, 300 km sýmen jabdyqtaý jáne 127 km sýdy burý jelileri salynyp, qaıta jóndeledi. Sátbaev qalasynyń turǵyndaryn jylýmen qamtamasyz etý jáne elektr energııasyn óndirý úshin zamanaýı bý-gaz qondyrǵysyn salý qajet. Sý qubyry jelilerin jańǵyrtý esebinen oblys ortalyǵy men Jańaarqa jáne Ulytaý aýdandarynyń 12 eldi mekenderiniń turǵyndaryn sapaly aýyz sýmen qamtamasyz etý josparlanýda. Investısııa kólemi - 450 mlrd. teńge.
Budan basqa, óńirdiń gaz ınfraqurylymyn damytý jobasyn iske asyrý úshin 34 mlrd.teńgeden astam qarajat bólinedi.
Jalpy somasy 264 mlrd.teńgege 227 km oblystyq avtojoldar jáne 118 km qalaishilik jáne kentishilik joldar salynady, qaıta jóndeledi jáne jóndeledi.
Týrızm salasyn damytýǵa 1,5 mlrd. teńge baǵyttaý kózdelgen.
Jalpy, is-sharalardyń barlyq keshenin iske asyrý ónerkásip kóleminiń 41% - ǵa, onyń ishinde óńdeý ónerkásibi kóleminiń 35% - ǵa ósýin qamtamasyz etedi. Negizgi kapıtalǵa salynǵan ınvestısııa kólemi 3,7 ese, al ShOB sýbektileriniń ónim shyǵarýy 2,5 esege ósedi. 9,5 myńnan astam jańa turaqty jumys oryndary qurylady.
Otyrys qorytyndysy boıynsha, Úkimet basshysy Ulttyq ekonomıka mınıstrligi men Ulytaý oblysynyń ákimdigine múddeli memlekettik organdarmen birlesip, jospardaǵy barlyq is-sharalardyń ýaqytyly oryndalýyn qamtamasyz etýdi tapsyrdy.