Astana qalasynda 5 qarasha kúni Jaqsylyq Úshkempirov atyndaǵy «Jekpe-jek» saraıynda qazaq kúresinen «Dala qyrandary» respýblıkalyq týrnıri ótedi, dep habarlaıdy Egemen.kz elorda ákimdiginiń resmı saıtyna silteme jasap.
Týrnırdiń maqsaty – 8 salmaq dárejesinde elimizdiń eń úzdik balýandaryn anyqtaý.
Jyl basynan beri 5 reıtıngtik jarys ótken edi. Sol jarystardyń qorytyndysy boıynsha ár salmaqtyń eń joǵary upaı jınaǵan 8 balýany anyqtaldy. Elorda tórindegi boz kilemde tek osy úzdikter ǵana beldesedi.
Sóıtip, týrnır sońynda tek 8 salmaqtyń jeńimpazdary ǵana marapattalady. Jeńistiń bıik tuǵyryna kóterilgender «Dala qyrany» tıtýlynyń ıegeri atanyp, óz salmaǵynyń «Bas balýany» ataǵyna ıe bolady.
Sol sııaqty ár salmaqtyń jeńimpazdary jeltoqsan aıynda elordada ótetin álem chempıonatyna joldama alady.