Búginde Qostanaıda jeńil avtokólik, traktor-kombaın, avtobýs, taǵy basqa da san alýan arnaıy tehnıka túrlerin qurastyratyn birneshe zaýyt bar. Alaıda bul zaýyttar óndiriske qajet qosalqy bólshektiń kóbin syrttan ákeledi. Degenmen óńirde kásipkerlikti damytýǵa arnalǵan memlekettik baǵdarlamalardyń qoldaýymen tehnıka qurastyrýǵa qajet usaq-túıek bólshekterdi uqsatyp jasap shyǵaryp jatqan shaǵyn kásiporyndar da boı kórsete bastady.
Máselen, tikeleı memlekettiń qarjylaı qoldaýymen eńse tiktegen Qostanaıdaǵy «Hydraulic systems Kazakhstan» kompanııasy búginde jeńil kólikten bastap, júk kólikterine deıin jaraıtyn jáne iri óndiris oryndaryndaǵy qurylǵylarda paıdalanylatyn joǵary qysymdy gıdravlıkalyq ishekterdiń 1,5 myńnan asa túrin jasap shyǵarady.
Kásiporyn basshysy Rýslan Dándibaev buǵan deıin qurylys salasynda qoldanylatyn san alýan qurylǵy-quraldardy alyp-satýmen aınalysqan. Biraz tájirıbe jınaqtaǵan kásipker bir qurylǵy satyp alǵan klıentti kem degende eki-úsh jylǵa joǵaltyp alatynyna kóz jetkizedi. Osylaısha, naryqta jıi suranysqa ıe taýarlardy qarastyra bastaıdy. Birneshe jylǵa sozylǵan tynymsyz izdenisten keıin túrli salada paıdalanylatyn joǵary qysymdy maıishekterge suranys kóp ekenin jáne ony jasap shyǵarý óziniń de qolynan keletinin túsinedi.
– Alǵash stanoktardy satyp aldyq. Biraq bir jyl boıy paıdalana almadyq. О́ıtkeni maıishekter men onyń basyna kıiletin fıtıngterdiń túri óte kóp. Munyń bárin meńgerý kerek boldy. Bir jyl ýaqytymyzdy osyǵan jiberdik. Reseıge baryp úırendik, Eýropadan maman shaqyrtyp oqydyq. Birtindep ónim shyǵara bastadyq. 2021 jyly óndiris aýqymyn keńeıtip, ónim túrin kóbeıtý maqsatynda jańa stanoktar men óndiriske qajet sapaly materıal satyp alý úshin ekinshi deńgeıli bankten 19 paıyzdyq ósimmen 16 mln teńge nesıe aldyq. «Damý» qory bul nesıeniń 13 paıyzyn sýbsıdııalady. Sonyń nátıjesinde, qazir biz nesıemizdi 6 paıyzdyq ósimpulmen jaýyp otyrmyz, – deıdi R.Dándibaev.
Kásiporyn jeńil kólikter men júk kólikterine, aýylsharýashylyq tehnıkalaryna, aýyr ónerkásip salasyna paıdalanylatyn qurylǵylarǵa joǵary qysymdy ustap tura alatyn gıdravlıkalyq maıishek jasaıdy. Máselen, Rýdnyı, Lısakov, Jitiqara tóńiregindegi iri kenishter aýyr tehnıkalarynyń tozǵan maıishekterin aýystyrý úshin osynda tapsyrys beredi.
– Biz jańa ónim shyǵarýmen qatar, eskirip, tozǵan joǵary qysymdy gıdravlıkalyq ishekterdi jóndeýmen de aınalysamyz. Mundaı tapsyrystar, ásirese, kóktemgi, kúzgi aýylsharýashylyq naýqany qyzǵan kezde kóbeıedi. Tapsyrys berýshi bizge jyrtylǵan shlangisin ákep beredi, biz soǵan qarap otyryp jańa maıishek jasap beremiz. Ishektiń úlgisi bolmaǵan jaǵdaıda gıdravlıkalyq júıeniń syzbasyna qarap otyryp jasaımyz. Bizdiń bızneste bir myń teńge paıda tabý úshin qoımada kem degende 100 myń teńgeniń taýary jatýy kerek. Tapsyrys berýshi seni kútip turmaıdy, izdegen dúnıesin dál sol ýaqytta taýyp berýdi talap etedi. Sondyqtan qazir biz daıyndap qoıǵan taýardyń quny 100 mln teńgeden asady, – deıdi satý bóliminiń bastyǵy Oleg Zgonnık.
Kásiporyn 12 adamdy turaqty jumyspen qamtyp otyr. Maıishek jasaıtyn stanoktardy arnaıy bilimi bar ınjener mamandar basqarady.
– Qazirgi aýylsharýashylyq tehnıkalarynyń gıdravlıkalyq maıishekteri bir-eki maýsymnan keıin tozyp, jyrtyla bastaıdy. Biz sony jóndep, jóndeýge kelmese, ornyna sapaly maıishek jasap beremiz. О́zimiz jasaǵan ónimge bir jylǵa deıin kepildik beremiz. Bizdiń shlangilerimiz de, fıtıngterimiz de óte sapaly. Sondyqtan kóbi bizge tapsyrys beredi. Maıishek jasaýǵa jaraıtyn shlangi ártúrli bolady. Onyń basyna kıiletin gıdravlıkalyq fıtıngterdiń de túri kóp. Japondyq, amerıkalyq, eýropalyq, qytaılyq, reseılik standarttary bar. Onyń jalǵaǵyshtary da san túrli – shar, konýs pishindes, tik, 45, 90 gradýstyq burysh bolyp keledi. Munyń bári kólikke baılanysty, máselen, Qytaıdyń 40 tonnalyq júk kóliginde eýropalyq nemese japondyq fıtıng turýy múmkin. Al «Belarýs» traktoryna reseılik, «Djon dır» kombaınyna amerıkalyq, «Claas» kombaınyna nemis standarty qajet, – deıdi stanokshy Darhan Álimbaev.
Qostanaıdaǵy «AgromashHoldıng» zaýytynan shyǵyp jatqan sý jańa kombaındardyń da gıdravlıkalyq maıishekteri osy jerde jasalady. Osylaısha, eski qosalqy bólshekterdi ońdaýmen qatar, jańa ónimdi kóptep shyǵaryp jatqan kásiporyn otandyq mashına jasaý óndirisiniń de jergilikti úlesin arttyryp otyr.
Qostanaı oblysy