Astana qalasynyń ákimi Altaı Kólginov Instagram paraqshasynda jańa kópirdiń qurylysy týraly aıtty, dep habarlaıdy Egemen.kz.
«Jyl saıyn qala turǵyndarynyń qatary kóbeıip, kólik nópiriniń artýyna baılanysty jol-kólik jelisin damytýǵa tıisti kóńil bólip kelemiz. Trafıkti jeńildetý jáne aýdandar arasyndaǵy qosymsha baılanysty qamtamasyz etý úshin kópirler, kósheler salamyz. Sol sııaqty joldardy keńeıtý jumysyn júrgizemiz», dep jazdy ákim.
Qala ákimi Esil ózeni arqyly ótetin Táýelsizdik dańǵylyndaǵy kópir qurylysynyń barysymen tanysty. Bul kópir Táýelsizdik dańǵyly, jańa temirjol vokzaly, Qoshqarbaev dańǵyly, Nájimedenov kóshesi, Áziret Sultan meshiti, Baıtursynov kóshesi, Qordaı, Aınakól, Momyshuly dańǵyly men sol jaǵalaý arasyndaǵy qosymsha baılanysty qamtamasyz etedi.
«Bul kópirdi 2023 jyly aıaqtaýdy josparlap otyrmyz. Osy jyldyń tamyz aıynda Uly dala dańǵylyndaǵy jańa kópir ústindegi qozǵalysty ashtyq. Kópir Máńgilik el dańǵylyna, A. Baıtursynov, R. Qoshqarbaev, J. Nájimedenov kóshelerine, Nova City aýdanyna, «Myńjyldyq» alleıasynda kólik aǵynyn seıiltýge, «Nurly jol» jańa vokzalyna, Telman jáne Promyshlennyı eldi mekenderine, Metro gıpermarketine, Jumabaev dańǵylyna, Júrgenov kóshesine jáne t.b. qoljetimdilikti arttyrady.
Sol sııaqty osy aıda A62 kóshesinde (A91 kóshesinen Astana-Qaraǵandy tas jolyna deıingi aralyq) qozǵalysty ashýdy josparlap otyrmyz. Bul kóshe Qaraǵandy tas joly, «Nurly Jol» temirjol vokzaly jáne qalanyń sol jaǵalaýy arasyndaǵy kólik qatynasyn qamtamasyz etedi», dedi Altaı Kólginov.
Sonymen qatar ol sońǵy jyldary 400-den astam kóshe jóndelgenin jáne olardyń jartysy eldi mekenderde ornalasqanyn atap ótti.
«Osyǵan deıin biz keshendi kólik shemasy (KKS) tujyrymdamasyn bekittik. KKS turǵyndardyń jyl saıynǵy ósimin jáne joldardaǵy trafıktiń ulǵaıýyn eskere otyryp, qalalyq kóliktiń 10 jáne odan da kóp jylǵa biryńǵaı tehnıkalyq paıymyn ázirleýge múmkindik beredi», dep jazdy elorda ákimi.