Eńbek jáne halyqty áleýmettik qorǵaý mınıstrliginde eń tómengi jalaqyny aıqyndaýdyń jańa ádistemesin ázirleıtin arnaıy jumys toby quryldy. Bul ádisteme ETJ mólsherin kezeń-kezeńimen ulǵaıtýǵa múmkindik beredi, dep habarlaıdy Egemen.kz vedomstvonyń baspasóz qyzmetine silteme jasap.
Búgingi tańda ETJ mólsheri tıisti jylǵa arnalǵan respýblıkalyq bıýdjet týraly zańmen belgilenedi.
«2022 jyly ETJ 60 myń teńgeni quraıdy, al 2023 jylǵy 1 qańtardan bastap 70 myń teńgege deıin ulǵaıtylady. Osylaısha, eki jyl ishinde ETJ mólsheri 65% - ǵa kóteriledi. Bul shara jalaqysy eń tómengi deńgeıde 1,6 mln jaldamaly qyzmetkerdiń aqshalaı tabysynyń ósýine ákeledi. ETJ anyqtaý ádistemesin ázirleý onyń mólsherin kezeń-kezeńimen ulǵaıtýǵa múmkindik beredi», delingen mınıstrlik habarlamasynda.
Jumys tobynyń quramyna ortalyq memlekettik organdardyń, áleýmettik áriptesterdiń ókilderi, sondaı-aq eńbekaqy tóleý salasyndaǵy sarapshylar kiredi. Ádistemeni ázirleý kezinde olar álemdik tájirıbede qoldanylatyn ETJ mólsherin anyqtaýdyń áleýmettik-ekonomıkalyq kórsetkishteri men tásilderine súıenedi.
Halyqaralyq tájirıbeni eskere otyryp, Qazaqstan úshin tıimdi bolatyn birneshe nusqany qarastyrýǵa bolady. Birinshisi – ómir súrý qunyn taldaý, tutyný sebetiniń quny, eń tómengi kúnkóris deńgeıi, ınflıasııa deńgeıi, ekonomıkanyń ósý deńgeıi, ortasha jáne ortasha jalaqy deńgeıi sııaqty kóptegen faktorlardy qoldanatyn keshendi tásil. Bul tásil Eýropalyq Odaqtyń kóptegen elderinde qoldanylady.
Ekinshisi – ortasha tabysqa negizdelgen ETJ anyqtaý. Halyqaralyq eńbek uıymy ETJ ortasha jalaqynyń kem degende 50% -yn quraýy kerek dep sanaıdy. Osyǵan uqsas tásil Fransııa, Brazılııa, Kosta-Rıka, Nıderlandy jáne Malaızııa sııaqty elderde qoldanylady.
Mundaı tásildi qoldaný kezinde dástúr boıynsha ETJ deńgeıi jyl saıyn belgilenedi, tómendetilmeıdi jáne kúnkóris deńgeıinen tómen bola almaıdy.
Qazirgi ýaqytta jumys tobynyń músheleri barlyq múmkin nusqalardy zerttep, pysyqtaýda. ETJ anyqtaý ádistemesin ázirleýdi 2023 jyly aıaqtaý josparlanyp otyr.