Qazaqstanda jańa avtokólikterdiń satylymy arta bastady. Biraq álemde bul kórsetkish áli de bolsa tómen. Máselen, AQSh-ta satylym 13 paıyzǵa quldyrasa, Shyǵys Eýropada 31 paıyzǵa deıin túsken. Bıyl úsh toqsanda búkil álemde 59,5 mln birlik jańa jeńil kólik satylǵan. Bul 2021 jyldyń uqsas kezeńimen salystyrǵanda 2 paıyzǵa tómen.
Sońǵy ýaqytta álem ekonomıkasynyń qozǵaýshy kúshine aınalyp kele jatqan Qytaıda avtosatylym úlesi 8,2 paıyz ósim kórsetken. 19,4 mln jańa kólik óz ıelerin taýypty. Qytaıdaǵy jaǵdaıdyń jaqsarýy jahandyq naryqtyń birtindep qalpyna kelýine áser etken. Degenmen sarapshylar kóp elderde ahýal áli de bolsa máz emes ekenin aıtady. Byltyrdyń úsh toqsanymen salystyrǵanda, Ońtústik Koreıada satylym – 6 paıyzǵa, Japonııada – 10,1 paıyzǵa, Batys Eýropada – 11,7 paıyzǵa, AQSh-ta 12,9 paıyzǵa azaıǵan. Al Shyǵys Eýropa elderinde jeńil jáne kommersııalyq kólikterdiń satylymy 30,5 paıyzǵa tómendepti.
Kórshiles Reseıdegi avtodılerlerdiń jaǵdaıy tipti nashar. Bıyl qańtar-qyrkúıek aılarynda 506,7 myń jańa jeńil jáne kommersııalyq avtomobıl satylǵan. 2021 jyldyń úsh toqsanymen salystyrǵanda 59,8 paıyzǵa tómendeý baıqalady. Al elimizde 9 aıda 87 myń kólik satyldy. Byltyrmen salystyrǵanda 0,4 paıyzǵa ósý bar. Úsh toqsannyń qorytyndysy boıynsha qazaqstandyqtar arasynda Chevrolet jáne Hyundai markalarynyń erekshe tanymaldylyqqa ıe ekeni anyq bolyp otyr. Osy eki brendke búkil satylymnyń 51,6 paıyzy tıesili. 24,5 myń Chevrolet, 20,4 myń Hyundai saýdalanǵan. Bul rette koreı kóliginiń satylym úlesi 14,7 paıyzǵa ósse, amerıkalyq kóliktiń satylymy 9,4 paıyzǵa artqan.
Qańtar-qyrkúıektegi satylym boıynsha TOP-10 marka qataryna taǵy eki qytaılyq brend kirip otyr, olar – Chery (2,5 myń avto) jáne Jac (2,1 myń avto). Osy qarqynmen jaqyn keleshekte qytaılyq brendter naryqty birjola jaýlaýy bek múmkin. Qazirdiń ózinde Astana Motors úsh birdeı qytaılyq avtogıgant – Changan, Chery jáne Haval avtomobılderiniń óndirisi boıynsha zaýyt qurylysyna kiristi. Bul, árıne, aldaǵy úlken áleýetten habar beredi. Changan Qytaıdaǵy óndiris deńgeıi boıynsha nómiri birinshi brend bolsa, Chery eksport boıynsha lıder atanyp otyrǵan kólik túri. Al Haval – Qytaı naryǵyndaǵy tórtinshi pozısııany ustap turǵan Great Wall Motor avtokonserniniń sýbbrendi.
Qazaqstan avtomobıl bıznesi qaýymdastyǵynyń deregine qaraǵanda, bıyl qyrkúıek aıynda 12 myń jeńil jáne kommersııalyq avtomobıl satylǵan. 2021 jyldyń qyrkúıegimen salystyrǵanda 19,3 paıyzǵa ilgerileý bar. El turǵyndary Chevrolet Cobalt pen Nexia-ny (2,5 myń jáne 1,1 myń avto), sondaı-aq Hyundai Tucson-dy (1,1 myń avto) kóp satyp alǵan. Budan ózge qyrkúıek aıyndaǵy satylym boıynsha úzdik ondyqqa Hyundai-dyń tórt modeli – Tucson, Santa Fe, Sonata, Elantra, Kia-nyń eki modeli – Ceed jáne Sportage, Toyota men Chery-diń bir-bir modeli – Land Cruiser Prado men Tigo 7 Pro kirgen.