Energetıka mınıstri Bolat Aqsholaqov Rıdderdegi jylý elektr ortalyǵynda bolǵan apatqa qatysty pikir bildirdi, dep habarlaıdy Egemen.kz.
«Rıdderde jaǵdaı qıyn. Qazir úsh qazandyq jumys istep tur. Keshe altynshy, negizgi qazandyqty iske qosqan edik. О́kinishke qaraı, túngi birde qazandyqty qaıtadan toqtatýǵa týra keldi. Qazir ol sýyp jatyr, salqyndaǵannan keıin tekseris bolady. Ázirge úsh qazandyq jylý beredi», dep jaýap berdi Bolat Aqsholaqov jýrnalıster qoıǵan saýalǵa.
Mınıstrdiń aıtýynsha, qazir apattyń mán-jaıy anyqtalýda. Munyń bári qural-jabdyqtardyń tozyǵy jetkenine baılanysty.
Sonymen qatar B.Aqsholaqov Rıdder Qazaqstannyń soltústik jáne shyǵys aımaqtaryn gazdandyrý josparyna engizilgenin atap ótti.
Mınıstrge «Rıdderde jańa jylý elektr ortalyǵy salyna ma?» degen suraq qoıyldy.
«Oılanyp kórý kerek. Bul jaı ǵana elektr energııasy emes, bul tarıf. Eskirgen stansııalardy aýystyrýdy qajet etetin, tozyǵy jetken kóptegen óńirler bar. Tarıfterdiń ósýi bir mezette emes, birte-birte bolýy kerek. Memleketke shamamen 500 mlrd teńge qajet – bul júıeni qalpyna keltirýge jáne jańartýǵa jumsalatyn shyǵyndar (jalpy Qazaqstan boıynsha)», dedi mınıstrlik basshysy.
Shyǵys Qazaqstan oblysynyń ákimdigi de Rıdder JEO-da úsh qazandyq jumys istep turǵanyn habarlady. №6 qazandyq, ákimdiktiń málimetinshe, «tótenshe jaǵdaıǵa baılanysty toqtap qalǵan». Ol jóndelip jatyr.
«Qurmetti turǵyndar, túnde 6-shy qazandyq jumys istep turǵan. Biraq saǵat 01:00-de apatty jaǵdaıǵa baılanysty toqtatyldy. Qazirgi ýaqytta úsh ortasha qysymdy qazandyq jumys istep tur. Qazir 6-shy qazandyqta jóndeý jumystary júrgizilýde. Aıaqtalǵannan keıin paıdalanýǵa beriledi. Sabyr etip, túsinińizder!», dedi qala ákimi Dmıtrıı Gorkov.
Eske salaıyq, 5 qarashada Rıdderdegi jergilikti jylý elektr ortalyǵynda taǵy bir apat boldy. 22 myń abonent jylýsyz qaldy, qalada tótenshe jaǵdaı jarııalandy. Rıdderlikter jaǵdaıdy baqylaýǵa alýdy surap, el Prezıdentiniń atyna petısııa jazdy.
Keıin Shyǵys Qazaqstan oblysynyń ákimi Danıal Ahmetov Rıdder qalasynyń jylý elektr ortalyǵyn kommýnaldyq menshikke berý máselesi qarastyrylyp jatqanyn aıtty.