Bir rettik raqymshylyq jasaý – elimiz úshin eleýli oqıǵa. Raqymshylyq týraly zańnyń ózi qańtar oqıǵasynan keıin uzaqqa sozylǵan tergeý-tekserý prosesteriniń sheshýshi kezeńi bolyp sanalady.
Árıne, bul zańnyń qabyldanýy ońaıǵa soqqan joq. Qujatty daıyndaý kezinde qanshama quzyrly memlekettik organdardyń qyzmetkerleri ter tókti?! Barlyq aıǵaqty, tıisti qujattardy jınap, saralap, aǵy men qarasyn ajyratý úshin aýqymdy jumystar atqaryldy. Bir jylǵa jeter-jetpes ýaqytta memleketimiz oń sheshim shyǵaryp otyr. Zańǵa sáıkes asa aýyr qylmys jasamaǵandar birden bostandyqqa shyǵady. Al aýyr qylmys jasaǵandardyń jaza merzimi qysqartylady. Bul jerde meıirimdilik aktisi zor qyzmet atqarǵanyn erekshe aıtyp ótken jón.
Sondaı-aq gýmanızm aktisi ádiletti qoǵam qalyptastyrýǵa úlesin qosady. Ár adam qatelik jasaýǵa quqyly desek te, dál qańtar oqıǵasy kezinde kóptegen adamnyń jazyqsyz japa shekkenine barsha qoǵam kýá bolǵany ras. Azamattarymyzdyń basym bóligi arandatýshylyq toptyń jeteginde ketip, qamaýǵa alyndy. Sondyqtan memleket bul jaǵdaıdy eskere otyryp, «Raqymshylyq jasaý týraly» zań qabyldaý jóninde sheshim shyǵardy. Bul shyndap kelgende, qańtar qyrǵyny kezinde jaza basqandarǵa berilgen zor múmkindik.
Raqymshylyq árıne tolyqqandy keshirim jasaý degendi bildirmeıdi. Muny qoǵam da, jekelegen adamdar da túsinýi kerek. Al raqymshylyqtyń ózi uzaq prosess. Zańǵa qol qoıylǵannan keıin raqymshylyqqa ilikkender kezeń-kezeńmen bosatylady. Keıinnen zań talaptaryna sáıkes áleýmettik máseleler boıynsha jumystar júrgiziledi. Uzaq ýaqyt jumysynan qol úzip qalǵandar bar, úısiz júrgender bar, olardy áleýmettik baspanamen qamtamasyz etý, jumysqa turǵyzý – mine, osynyń barlyǵy aýqymdy jumys.
Qańtar oqıǵasynan keıin árbir azamat oılanyp, sheshim qabyldaýy qajet. Árıne, tańdaý árkimniń óz paıymyna qaraı jasalady. Memleket raqymshylyq jasap, túsinistik tanytyp, qoldaý bildirip otyrǵan kezde azamattarymyzdyń da osy sheshimge asqan jaýapkershilik qaraǵany, qoǵamǵa paıdaly is qylǵany durys.
Aman MÁMBETALIEV,
saıasattanýshy