Májilis Tóraǵasynyń orynbasary Darıǵa Nazarbaeva Parlamentte Malaızııanyń jáne Iordanııanyń Qazaqstandaǵy elshileri Dato Hıdaıat Abdýl Hamıdpen jáne Slaıman Arabıatpen kezdesti, dep habarlady Májilistiń baspasóz qyzmeti.
Sheteldik dıplomattarmen áńgime barysynda ekijaqty qarym-qatynastyń búgini men bolashaǵy talqyǵa tústi. Vıse-spıker malaızııalyq elshini qyzmetke taǵaıyndalýymen quttyqtaı otyryp, Malaızııa Premer-mınıstri Razaktyń Astana ekonomıkalyq forýmy aıasynda Qazaqstanǵa jasaǵan resmı sapary ekijaqty qatynastyń damýyna, sonymen birge, halyqaralyq uıymdardaǵy birlesken yntymaqtastyqqa tyń serpin beretinin atap ótti.
Kezdesý barysynda «Bolashaq energııasy» taqyrybymen Astanada ótetin EKSPO-2017 halyqaralyq kórmesi jaıyna da nazar aýdaryldy.
Túrli halyqaralyq uıymdar men aımaqtyq qurylymdar aıasynda ózara is-qımyldy nyǵaıtý ıordanııalyq elshimen júzdesý kezinde de nazardan tys qalmady. Osy rette búkil álemde ıadrolyq qarýdy taratpaý jáne ıadrosyz aımaq qurýǵa qatysty syrtqy saıası beıbit bastamalardyń mańyzdylyǵy da tilge tıek etildi.
Sonymen qatar, parlamenttik ıntegrasııanyń, atap aıtatyn bolsaq, yntymaqtastyq jónindegi parlamentaralyq toptar túrindegi baılanystyń ózektiligi áńgimege arqaý boldy.
Kezdesýge Májilistiń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev qatysty.